Pagpangandam sa Kaugalingon alang sa Dalan nga Matarong

Ika-2 Domingo sa Adbiyento (December 8, 2024)
Bar 5:1-9 / Ps 126:1-2, 2-3, 4, 5-6 / Phil 1:4-6, 8-11 / Lk 3:1-6

Ang Ebanghelyo ni San Lucas, nagpahinumdom nga kinahanglan natong andamon ang dalan alang sa pag-abot sa Ginoo. Si San Juan Bautista nagdala sa mensahe sa paghinulsol ug pagbag-o. Ang mga pulong ni Propeta Isaias nga nagsulti, “Andama ang dalan sa Ginoo, tul-ira ang iyang mga agianan,” nagpasabot nga kinahanglan kitang mag-andam, maglimpyo, ug magtul-id sa atong mga kasingkasing alang sa Dios. Tulo ka mga punto ang buot kung ipaambit kaninyo:

Una, Pagpangandam sa Kasingkasing: Gihangyo kita nga mangandam dili lang alang sa Pasko sa pagkatawo sa atong Ginoo, apan sa pagpangandam usab sa inadlaw-adlaw niyang pag-abot sa atong kinabuhi. Ang “bako-bako” ug “lubak-lubak” nga dalan diha sa atong kinabuhi, nagrepresentar sa atong mga kasal-anan ug kakulangon. Pinaagi sa paghinulsol ug pagsugid sa sala, mahimo natong maandam ang atong kaugalingon alang sa iyang grasya.

Ikaduha, Paghimo sa Maayong Buhat: Ang pagtul-id sa dalan diha sa atong kinabuhi, nagpasabot sa pag-usab sa atong mga binuhatan. Kung adunay kaligutgut, magpasaylo. Kung adunay nagkinahanglan, tabangan. Ug kung adunay kalisod, magpakita kita sa katarungan ug kalinaw. Ang atong mga maayong buhat mao ang dalan kung diin makita sa uban ang gugma ug kalooy sa Ginoo.

Ikatulo, Pagkahiusa ug Pagsalig: Ang pagpangandam dili lang personal natong buluhaton, apan usa usab ka panaw uban sa komunidad. Kita gidapit sa Ginoo nga maghiusa sa pag-ampo ug pagpakita sa paglaum. Pinaagi sa atong panagahiusa, makita nato ang kahulugan sa kaluwasan nga gitanyag sa Dios kanato.

Sa katapusan, ingong mga magtotoong Katoliko, kita magpuyo pinaagi sa mga sakramento, pagbasa sa pulong sa Dios, ug pagbuhat og maayo ngadto sa uban. Ang Adbiyento mao ang panahon sa paghinulsol ug pag-andam alang sa pagpakatawo sa atong Ginoo, apan kini usab mao ang panahon nga magpuyo kita nga puno sa pagtoo ug gugma. Pinaagi niini, kita mamahimong suga ug kahayag sa uban.

Ang dalan alang sa Ginoo andam kung kita magkinabuhi nga puno sa gugma, hustisya, ug katarungan. Maghiusa kita aron magdala sa kahayag nga dala ni Kristo sa kalibutan, ug sa ingon, “ang tanan makakita sa kaluwasan sa Dios.” (Rev. Fr. Julius Lugay)