Ang Pagpadayon Kun “Panunuluyan” Gipasiugda

Ang apostolado sa mga kabatan-onan sa San Antonio de Padua parish nagpahigayon og usa ka dramatizasyon niadtong Desyembre 24, 2024. Kini ilado sa Tagalog nga pinulongan nga “Panunuluyan,” usa ka tradisyon sa Mexicano nga gipahiangay sa mga Pilipino.

Ang panunuluyan gilangkuban og musikal nga dramatizasyon diin gipakita ang kahimtang ni Maria ug ni Jose samtang sila nangita og puluy-anan sa pagpahiluna sa pag-anak sa batang Hesus. Apan ang nakahimo niini nga mas espesyal mao ang paghubad sa Panunuluyan ngadto sa Cebuano nga pinulongan, “Ang Pagpadayon.” Gihimo kini aron mas masabtan ug mas mabati sa mga parokyano ang kasaulogan sa pasko sa pagkatao, ang gabii kung kanus-a gianak si Hesus. Ang paghubad niini giniyahan sa mga eskrip o sinulat sa lain-laing mga Dioceses sa Pilipinas ug gihan-ay pag ayo aron dili mawala sa iyang tumong. Aduna lamang pipila ka mga kanta nga gumikan sa Tagalog nga pinulongan ang gigamit kay tungod sa iyang haum nga mensahe.

Mao usab kini ang ika-lima nga pagpahigayon niining dramatizasyon sa maong parokya ug ang tanan gipasiugda sa mga kabatan-onan sugod niadtong tuig 2018. Adunay 30 minutos nga gigahin alang kanila sa pag presentar niini bago ang Santos nga misa ug kaduha kini gihimo, sa alas 6:30 ug alas 8:30 sa gabii. Sa katapusan sa ilang presentasyon mao ang pagpanalangin sa Belen.

Sa hamubo nga panahon, nahimo gihapon nga maanindot ug mabungahon ang presentasyon tungod sa pagpaambit sa mga batan-on sa ilang mga talento inubanan sa supporta sa ilang youth director nga si Padre Ranie Boy Pamplona,DCD ug kura paroko nga si Padre Amado Arroyo, DCD. Dugang pa niini, mipaambit usab ang Casa sa ilang maanindot nga mga tingog, sila ang usa ka grupo sa mga schola cantorum nga gitukod ni Padre Amiel Arado sa simbahan sa San Antonio, Agdao. Miabot og kwarenta ka mga batan-on ang nagpasundayag, lakip niini ang mga casts ug ang ang mga committee.

Daghang mga parokyano ang nakasaksi usab niini ug pipila ang niingon nga ang paghubad gikan sa Tagalog nga pinulongan ngadto sa Cebuano nakadugang og positibo nga epekto sa kinatibuk-ang presentasyon. Andam usab ipaambit sa parish youth apostolate sa Agdao ang ilang gihimo nga eskip o sinulat sa ubang parokya nga nagaplano magpasundayag og “Ang Pagpadayon” kun Panunuluyan sa panahon sa Pasko sa pagkatawo sa atong Ginoo. Kini nindot nga higayon aron sila mas makalambigit sa mga misteryo sa pagpakatawo sa Anak sa Ginoo. (Harold Jhon A. Gimeno | Photos by San Antonio de Padua Youth Apostolate)