Karong Adlawa Natuman Kining Kasulatan

Ika-3 nga Domingo sa Ordinaryong Panahon (January 26, 2025)
Neh 8:2-4a, 5-6, 8-10 / Ps 19:8, 9, 10, 15 / 1 Cor 12:12-30 or 1 Cor 12:12-14, 27 / Lk 1:1-4; 4:14-21

Karong adlawa si Jesus mitindog aron sa pagbasa ug nakita ang usa ka tudling gikan sa basahon ni propeta Isaias nga nagsugod niining paagiha: “Ang Espiritu sa Ginoo ania kanako, tungod kay gidihogan niya Ako aron pagsangyaw sa maayong balita ngadto sa mga kabos.” Gituman sa Diyos ang iyang laraw nga luwason niya ang iyang katawhan diha sa sala ug kamatayon og natuman kini karong adlawa.

Ang “karon” importante alang kang San Lukas tungod kay karong adlawa ang Ginoo wala magsalikway sa naandan nga sinemana nga liturhiya ug nakig-uban sa panagtigum sa iyang mga katagi-lunsod diha sa pag-ampo ug sa pagpaminaw sa Kasulatan. Ang ritwal naghatag alang sa pagbasa sa usa ka teksto gikan sa Torah o sa mga Propeta ug sundan kini sa usa ka komentaryo. Si San Cyril sa Alexandria nag-ingon nga ang pulong “karon”, gibutang sa tali sa taliwala sa una ug sa katapusan nga pag-anhi ni Kristo, aduna kini kalabutan sa katakus sa atong pagpaminaw ug paghinulsol. Apan sa mas radikal nga diwa, ang atong Ginoo mismo mao ang “karon” sa kaluwasan sa kasaysayan, tungod kay iyang gitapos ang buhat sa pagpanubos.

Mga kaigsoonan ko diha kang Kristo, kini nga tudling sa Ebanghelyo naghagit usab kanato “karon”. Una sa tanan, kini maghatag kanato sa paghunahuna kon giunsa nato pagkinabuhi ang adlaw nga Domingo, usa ka adlaw sa pagpahulay ug usa ka adlaw alang sa pamilya. Labaw sa tanan, kini ang adlaw sa paghalad ngadto sa Ginoo, pinaagi sa pag-apil sa Eukaristiya, diin kita gialimahan sa Lawas ug Dugo ni Kristo ug sa iyang Pulong nga naghatag ug kinabuhi.

Ikaduha, sa atong nagkadaiya ug makabalda nga panahon, kining maong pulong sa Ebanghelyo nagdapit kanato sa pagpangutana sa atong kaugalingon kon kita nakahimo ba sa pagpaminaw. Sa dili pa kita kasulti kabahin sa Dios ug uban sa Dios kinahanglan nga kita maminaw kaniya, ug ang liturhiya sa Simbahan mao ang eskwelahan niining pagpaminaw sa Ginoo nga nakigsulti kanato. Sa kataposan, gisultihan niya kita nga ang matag gutlo mahimong “karon” alang sa atong pagkakabig ngadto Kaniya. Ang matag adlaw mahimong karon sa atong kaluwasan, tungod kay ang kaluwasan usa ka istorya nga nagpadayon diha sa Simbahan ug sa matag disipulo ni Kristo. Mao kini ang Kristohanong kahulogan sa adlaw diin ang Dios nagtawag kanato aron sa paghatag kanato sa kaluwasan. Amen. (Fr. Soren Abellanosa)