Nazareno 2025: Walay Kristo Kon Wala Ang Krus

Puno sa debosyon ug kamaya nga gisaulog sa GKK Our Lady of Peñafrancia Deca Homes nga sakop sa San Alfonso Maria de Liguori Parish Mandug ang ika-napulong kapistahan sa Nuestro Padre Hesus Nazareno kaniadtong Enero 9, 2025. Kini inubanan sa tema nga: “Pabilin kamo Kanako, ug Ako magpabilin kaninyo.” – Juan 15:4.

Ang maong katilingban mao ang nahimong magbalantay sa 10th Official Replica sa Nuestro Padre Hesus Nazareno nga gikan sa Quiapo Church. Sa susamang paagi, ilang gihandum ang ika-napulong anibersaryo sa Official Installation sa replica sa maong kapilya.

Nagsugod ang kasaulogan pinaagi sa Solemn Translacion nga nanukad gikan sa San Alfonso Maria de Liguori Parish Mandug ug gisugdan sa Rite of Departure sa alas 8 sa buntag. Human sa rito, ang translacion nagsugod diin naglakaw ang kapin usa ka gatos ka mga deboto padulong sa GKK Our Lady of Peñafrancia Deca Homes.

Pag-abot sa kapilya, gisugat ang replika sa pagwagayway sa mga panyo ug tela sa mga deboto inubanan sa pagsiyagit og “Viva Poong Hesus Nazareno!” Tuod man gikan pa ang mga deboto sa hataas nga pagbaktas sa mainit nga panahon, makita ang kalipay sa matag usa.

Misunod dayon niini ang Pontifical Mass sa alas 10 sa buntag nga gipanguluhan ni Most. Rev. Romulo G. Valles, D.D., Arsobispo sa Dabaw inubanan nila Rev. Fr. Jemasol “Jojo” Ortiz, Kura Paroko sa San Alfonso Maria de Liguori Parish Mandug ug ni Rev. Fr. Allan Fiel nga gikan sa Diocese of Tandag.

Sa homiliya ni Abp. Valles, iyang gipunto ang tulo ka butang: 1. Ang kahingpitan sa pagdebosyon sa Nazareno anaa sa kasaulogan sa Santos nga Misa, 2. Puno sa kadasig ug paglaum nga pas-anon ang atong mga kaugalingong krus, 3. Mopahiyom kita tungod kay kita nasayod nga ang Krus kanunay’ng madaugon.

Dugang pa sa arsobispo nga kung lantawon ang imahe sa Poong Hesus Nazareno, makita nga si Hesus makita nga nakasuot ug bulawan nga korona ug maanindot nga bisti nga nagpasabot nga taliwala sa kalisud ug pag-antus, kini magdala ngadto sa kadaugan ug hingpit nga kalipay sa langit. Iya usab nga gipahinumduman ang tanan nga walay Krus ug wala si Kristo ug sa samang paagi walay Kristo nga walay Krus.

Dako ang pasalamat ni Abp. Muloy sa paningkamot sa mga taga GKK Our Lady of Peñafrancia Deca Homes ug sa suporta sa parokya sa San Alfonso Maria de Liguori Parish Mandug ilabina nga naghinay-hinay na ug abot sa mga kasikbit nga parokya ang balita nga anaa makita ang Offficial Replica gikan sa Quiapo ug nagresulta sa pagpakaylap usab sa maong debosyon.

Human sa Santos nga Misa, adunay gihimong pahalok ug paghikap sa Poong Nazareno ug pagka alas sais sa gabii aduna pay ika-duhang Misa nga gipanguluhan ni Rev. Fr. Roy Vincent Husain, MLCC.

Viva Nuestro Padre Hesus Nazareno!

(By Allyza Hope J. Tabigue)