Nazareno sa Dabaw magpulo ka tuig na

Mga ka-deboto sa Mahal na Poong Hesus Nazareno dinhi sa atong siyudad sa Dabaw, saulogon nato ang ika-10 nga Kapistahan sa Mahal na Poong Jesus Nazareno dinhi sa atong siyudad sa Dabaw karong Enero 9, 2025, adlawng Huwebes.

Atong gikagarbo sa tanang mga Dabawenyo nga aduna kita’y Official Replica nga imahen sa Mahal na Poong Jesus Nazareno gikan mismo sa Minor Basilica and National Shrine of the Poong Jesus Nazareno, o mas giila nga Quiapo Church.

Ang maong replica sa Poong Jesus Nazareno nga nahimutang sa Our Lady of Peñafrancia GKK Chapel, DECA Tigatto, Buhangin, Davao City ginaduaw sa mga Dabawenyo ug nagaapil sa Santos nga Misa matag Domingo tungod sa mga makadaghang grasya nga ilang nadawat pinaagi sa pagdebosyon sa Mahal na Poong Jesus Nazareno.

Isip pagsaulog sa ika-10 nga Kapistahan sa Mahal na Poong Jesus Nazareno dinhi sa atong Siyudad, gianunsyo sa mga organisers niining kapistahan nga aron mas mapaduol pa ang Nazareno sa iyang Katawhan, igawas ug iduaw ang official replica sa 3 ka mga Parokya dinhi sa Arkidiyosesis sa Dabaw sulod sa adlaw sa Nobenaryo gikan Disyembre 31 hangtud Enero 8.

Sa Enero 2-3, ang Official nga Replika sa Mahal na Poong Jesus Nazareno moduaw sa Our Lady of Perpetual Help Redemptorist Parish, Bajada, Davao City atbang sa Abreeza Mall.

Sa Enero 4-5, moduaw ang Nazareno sa Our Lady of Miraculous Medal Parish, Indangan, Buhangin, Davao City.

Sa Enero 6-7, moduaw ang Nazareno sa St. Mary of the Perpetual Rosary Parish, Cabantian, Buhangin, Davao City.

Sa Enero 8, moduaw ang Nazareno sa San Alfonso Maria de Liguori Parish, Mandug, Buhangin, Davao City.

Sa Enero 9, ang adlaw mismo sa Kapistahan sa Poong Jesus Nazareno sa tibuok nasud, adunay pagahimuong Solemn Traslacion Procession nga magsugod sa San Alfonso Maria de Liguori Parish pabalik sa Our Lady of Peñafrancia GKK Chapel, DECA Tigatto, Buhangin, Davao City ug magsugod kini sa alas 8 sa buntag.

Mosunod kini ang Misa Nazareno nga saulogon mismo sa Our Lady of Peñafrancia GKK Chapel, DECA Tigatto, Buhangin, Davao City sa alas 10 sa buntag ug sa alas 6 sa hapon.

Giawhag ang tanang mga kabatan-onan, ug mga pamilya nga moapil niining sagradong kalihukan isip pagpasalamat sa Mahal na Poong Jesus Nazareno sa tanang mga grasya ug kalooy nga nadawat.

Giawhag usab ang mga deboto nga magdala sa ilang kaugalingong imahen sa Nazareno aron mabendisyunan sa mga kaparian.

Gilauman anaa sa gatusan ka mga deboto ug mga magtotoong Katoliko ang moapil niining sagradong kalihukan dinhi sa siyudad.

Naghinaot ang mga organisers sa ika-10 nga Kapistahan sa Poong Nazareno dinhi sa siyudad nga pinaagi niining aktibidad, mas mapalig-on pa ang pagtoo ug pagsalig sa mga Dabawenyo ngadto sa Makagagahum taliwas sa mga hagit ug mga problema nga giatubang sa atong siyudad ug sa atong nasud.