Pagpaubos sama sa batang Hesus

Pista sa Batang Hesus (January 19, 2025)
Is. 9:1-6 / Ps. 97:1, 2-3, 3-4, 5-6, 7 / Eph. 1:3-6, 15-18 / Lk. 2:41-52

Karong adlawa, atong gisaulog ang Kapistahan sa Santo Niňo, usa sa mga paboritong larawan mahitungod kang Jesu-Kristo sa katawhang Pilipino. Kitang mga Pilipino nahigugma pag-ayo sa Balaang Batang Hesus (Santo Niňo). Ug gani sikat kaayo siya sa tanan; ma-adunahan o mapubri ka man.

Aduna kitay lain-laing pamaagi sa pagdebosyon sa batang Hesus. Ang kasagaran kanato, ang atong mga imahen sa Santo Niňo, atong gibistihan sa harianong bisti, sa uniporme sa pulis ug bombero ug daghan pa.

Ang imahen sa Batang Hesus gipakita halos bisan asa: sa mga stall sa merkado ug mga establisemento sa negosyo, sa publiko ug pribadong opisina, sa mga bus ug jeepney, pribadong mga sakyanan ug sa mga panimalay.

Apan ngano man ang Santo Niňo usa sa mga makapadani sa daghang mga Pilipino? Tungod ba ni sa pagkainosente ug pagka-yano sa Batang Hesus? Sa unsang paagi nahitabo ang debosyon? May basihan ba kini sa Bibliya ug sa teolohiya? Unsay gitudlo kanato sa debosyon?

Mga igsoon, Naay daghang nindot nga mga hiyas sa bata sama sa gahom sa pagpangutana, sa gahom sa pagpasaylo ug sa paglimot sa mga sayop natong nabuhat ug ang abilidad sa pagkat-on. Apan adunay tulo ka labing importante nga mga kinaiya nga naghimo kaniya nga simbolo sa usa ka lungsoranon sa Gingharian sa Langit.

Una mao ang pagkamapaubsanon. Ang bata dili gyud na gusto mag-una, gusto gyud na siya permi magpaulahi. Ang mga ginikanan ang interesado nga iduso sila sa pagkaprominente. Mao bitaw’ng ang pipila, ginapa-apil sa beauty contest o modelling para taas sila tan-awon sa uban.

Ikaduha mao ang pagsalig. Ang bata kontento nga magsalig sa mga nag-atiman ug nagmahal kaniya. Kini makita samtang ang bata nagbutang sa iyang kamot nga masaligon sa dagkong mga kamot sa iyang mga ginikanan, samtang sila motabok sa dalan.

Busa sa kataposan, sa atong pagsaulog sa kapistahan sa Santo Niňo, gitawag ug gihagit kita sa Dios nga mahimong sama sa bata niining duha ka kinaiya. (Fr. Ranie Boy Pamplona)