Sagrada Pamilya Duha ka Dekada na

Gisaulog sa Parokya sa Sagrada Pamilya sa Brgy. Dumoy ug Baliok ang ika-20 nga kapistahan nga adunay tema nga, “Manlakaw Kita nga Malaumon Uban sa Sagrada Pamilya”.

Ang kapistahan gipangandaman pinaagi sa ispirituwal ug pisikal nga buluhaton. Niadtong Disyembre 13, gipahigayon ang usa ka recollection nga gihatag sa Parochial Vicar, Fr. Ritzchild John S. Cariaga. Gisunod pod dayon ang Bayanihan sa Parokya niadtong Disyembre 14 diin ang mga parokyano nanglimpyo sa sulod ug gawas sa simbahan lakip na ang pagtaod sa mga banderitas.

Sa bisperas sa pista, adunay gipahigayon nga misa nga gipanguluhan ni Fr. Roger D. Duhaylungsod, kura-paroko. Iyang gipadayag ang kaayo sa Ginoo sa paggiya sa mga parokyano sulod sa duha ka dekada. Matod niya, ang kalambuan sa parokya naghulagway sa kamot sa Ginoo nga nagalihok kauban ang katawhan.

Paghuman sa misa, gipahigayon ang prosesyon sa mga patron gikan sa matag Gagmay’ng Kristohanong Katilingban (GKK).

Human sa prosesyon giablihan ang programa diin nagkatapok ang mga miyembro matag sona diha sa ilang gihimong balay-balay nga naghulagway sa pista sa nayon. Nalingaw ang mga nanambong tungod sa mga padula nga naay mga premyo. Nagkauban usab ang mga parokyano sa simpleng paniudto nga giandam sa matag sona.

Sa alauna sa hapon, gisugdan ang presentasyon nga giandam sa matag sona, kasagaran niini mga sayaw nga nagpakita sa kulturang Pilipino.

Tungod kay ika-20 na nga kapistahan ang selebrasyon, gihatagan ug pag-ila ug pasidungog ang kapin 80 ka mga GSL ug miyembro sa mandated organizations nga nakaserbisyo na sa Parokya sa sulod sa 20 ka tuig. Kini nga lakang, nagpakita ug pagdayeg ug paghatag ug importansya sa mga pangulo nga nagserbisyo sukad pa sa pagtukod sa parokya hangtod karon. Malipayon usab nga niuli ang 20 ka swerteng parokyano nga midaug sa raffle.

Disyembre 29, sa alas diyes sa buntag, gipahigayon ang Pontifical Mass nga gipanguluhan ni Arsobispo Romulo G. Valles, D.D. kauban ang pipila ka mga kaparian. Gidayeg sa arsobispo ang mga ginikanan nga kauban ang mga anak nga mitambong sa misa. Siya nagpahinumdom usab sa katungdanan sa mga ginikanan sa pag-atiman sa ilang mga anak. Siya namahayag sa kamahinungdanon sa mga anak ug kabataan isip mga gasa sa Dios diha sa pamilya ug simbahan.

Libreng paniudto ang gidalit sa mga parokyano paghuman sa Pontifical Mass. Sadya ang palibot sa simbahan tungod kay dunay nagkalain-laing mga booth sama sa ice cream, photo, dessert, candy, popcorn ug drinks nga gidagsa sa katawhan. Kini gihimo isip pasalamat sa mga gasang naangkon sa parokya sa sulod sa 20 ka tuig.

Nanghinaot ang Parish Pastoral Team inubanan sa mga parokyano nga magmalahutayon ang tanan alang sa kaayuhan ug kalambuan sa parokya. (Flor Arellano-Deloria | SoCCom, Holy Family Parish)