Ang Dakong Pagtagad sa Dios

Ang pagsaulog sa ika-kwarenta y dos nga kapistahan sa Sto. Niño Parish sa Kaputian, nagpahinumdom kanato nga bisan kita makasasala, dili nato kalimtan nga anaa ra ang Ginoo naga-giya sa atoa tungod kay kita iyang mga anak ug dili niya pasagdaan ilabina kadtong misalig kaniya. Sumala pa ni Propeta Isaias, “Ang mga tawo nga nagalakaw sa kangitngit tungod sa sala, nakakita ug dakong kahayag diha kang Kristo, nga mao ang kahayag sa kalibutan ug ang kahayag diha sa atong kinabuhi.” Kini nagapasabot nga kita dili mahadlok kang Hesus, gani siya man ang atong magbalantay, siya atong kahayag kung anaa kita sa kangitngit sa atong kinabuhi.

Ang kasaulogan sa Sto. Niňo nga pista dili lang malukop sa bulan sa Enero, kini magpadayon sa Pebrero tungod sa kadaghan sa mga deboto ni Hesus ug daghang mga GKK nga Sto. Niňo ang patron. Kini nagapamatuod nga kitang mga tawo dako ang pagsalig sa Dios. Sumala ni Msgr. Julius Rodulfa nga nagsaulog sa Santos nga Misa, Si Hesus atong kahayag, siya pud ang atong paglaum.

Kini nagapamatuod nga si Hesus ang sentro sa atong kinabuhi ug angay kitang mabalaka kung Siya mawala. Kung kita magpakasala, mawala ang Ginoo satung kasingkasing. Unsa kaha atung mga pagbati, ug tungod posible sa atung mga bisyo mahilayo kita sa Ginoo. Makaingon kita, wala ang Ginoo sa atong kinabuhi aduna ba kitay ikabalaka o muingon nalang kita nga okay nalang ni, mao na ni akong kinabuhi.

Sa atong pagsaulog sa pista sa Sto. Niño, hinaut nga atong hinumduman nga ang tinuod nga pagmahal sa Ginoo dili lang sa pagsinggit og “Viva Señor Sto. Niño!” apan sa matuod nga pagpuyo sa iyang mga pagtulun-an. Magpabilin unta kita nga masinugtanon ug matinumanon sa atong pagtuo, ug himoon natong timaan sa matag adlaw nga si Kristo mao ang atong kahayag, paglaum, ug kaluwasan. (Earl Joseph Aranjuez | Assumption College of Davao Immersionist)