Ang Maayong Kahoy Mamunga og Maayong Bunga

Ika-8 nga Domingo sa Ordinaryong Panahon (March 2, 2025)
Sir 27:4-7 / Ps 92:2-3, 13-14, 15-16 / 1 Cor 15:54-58 / Lk 6:39-45

Ang atong Ebanghelyo karon naghisgot kabahin sa dakong pahinumdom nga sama sa kahoy nga mamunga sumala sa iyang kinaiya, kita nga mga magtotoo maila usab sumala sa atong mga pulong ug buhat kay kon unsa ang sulod sa atong kasingkasing mao usab kini ang mogawas diha kanato. Ang atong Ginoo nag -ingon nga “Ang maayong kahoy mamunga ug maayong bunga, apan ang dautang kahoy mamunga usab ug dautang bunga.” Kini nagpasabot nga kon limpyo ug puno sa gugma ang atong kasingkasing, mamahimo kitang mamunga sa maayong bunga. Ang gugma, kaluoy, ug katarong mao ang mga maayong bunga niini. Apan kon puno sa kasuko, kasina, ug pagdumot ang atong kasingkasing, makita kini sa atong mga sinultihan ug binuhatan.

Sa laing bahin, dili ta angay magpabilin sa paghukom sa uban. Ang atong Ginoo nag-ingon, “Igsoon, tugoti ako nga mokuha sa puling diha sa imong mata, Tigpakaaron -ingnon, kuhaa una ang balabag gikan sa imong mata ug unya makakita ka na og maayo aron pagkuha sa puling diha sa mata sa imong igsoon.” Sa ingon niini nga paagi dili kita angay nga manghimantay sa sayop sa uban, kay kinahanglan una nato limpyohan ang atong kaugalingon ilabina diha sa sulod sa atong kasingkasing. Ato unang pormahon ang atong kaugalingon sumala sa pagkatawo sa atong Ginoo. Sa ingon niini makahimo na kita pagtangtang sa puling sa uban.

Ang nagsingabot nga panahon sa Kwaresma usa kini ka oportunidad sa paglantaw og balik sa atong tagsa-tagsa ka kaugalingon ug atong pamalandongan ang nanghitabo diha sa atong kinabuhi. Kini usa ka panahon sa pagtimbangtimbang sa atong kaugalingon. Atong pangutan-on ang atong kaugalingon kon nakabunga ba kita sa maayong bunga? O adunay mga sanga sa atong kinabuhi nga nagkinahanglan og pagpul-ong aron mapurma usab sumala sa kabubut-on sa Ginoo. Ang atong kinabuhi susama sa usa ka mag-uuma nga nagputol sa mga patay nga sanga aron motubo ang kahoy sa hustong paagi, kita usab nagkinahanglan sa paghinlo sa atong kaugalingon nga kinaiya. Kini nagpadayag nga dili aron ipakita sa uban nga kita maayo, apan aron mahimong tinood nga mga saksi sa gugma sa atong Ginoo.

Sa katapusan, atong pangayoon sa atong Ginoo nga tabangan kita nga limpyohan pag-una ang atong kasingkasing, aron diha sa atong mga pulong ug buhat makita ang iyang gugma ug kahayag. Ug pinaagi niini, ang atong kaugalingon nga naporma na, mahimo kitang inspirasyon ug giya sa uban, aron kitang tanan mamunga sa bunga sa kaluoy, katarong, ug gugma nga diin nakasukad diha lamang sa atong Ginoo. (Fr. Soren Abellanosa)