GRATIAS TIBI, DEO! Unang Obispo sa Dayosis sa Prosperidad
Malampusong gipahigayon ang pag-instalar sa labing unang Obispo sa bag-ong natukod nga Dayosis sa Prosperidad sa Agusan del Sur Enero 28, 2025.
Sa paghiabot ni Bishop Ruben Labajo sa Dayosis sa Prosperidad mainiton nga gitagbo sa mga molupyo pinaagi sa pagwara-wara sa ilang mga dala nga mga banderitas, mga kanta ug sayaw.
Naordinahan sa pagka-Obispo si Labajo ug natudlo isip Auxiliary Bishop sa Archdiocese of Cebu ug Titular Bishop sa Abbir Maius niadtong Hunyo beinte tres tuig dos mil beinte dos. Naordinahan siya sa isip titular bishop sa Abbir Maius niadtong Agosto deci nwebe tuig dos mil beinte dos.
Gi-anunsyo ni Papa Francisco ang iyang katudluan isip labing unang Obispo sa Dayosis sa Prosperidad niadtong Oktubre kinse, tuig dos mil beinte kwatro ug gitakda ang iyang instalasyon Enero Beinte ocho.
Nahiabot si Labajo adlawng Lunes sa Bishop’s House sa Ampayon Butuan City gikan sa Cebu diin mainiton siya nga gidawat ni Bishop Cosme Damian Almedilla, Obispo sa Diocese of Butuan.
Giisip nga usa ka makasaysayon nga gutlo kini sanglit si Labajo maoy labing unang Obispo sa Prosperidad nga kanhi sakop sa Dayosis sa Butuan.
Malipayon nga gi-welcome si Labajo sa Diocese sa Prosperidad nga naglinya sa kadalanan samtang miagi ang iyang convoy paingon sa St. Michael the Archangel Cathedral sa Prosperidad.
Giabi-abi siya sa kaparian, mga layko ug mga parokyano ug mihunong sa tiilan sa altar alang sa usa ka hamubu nga pag-ampo.
Human sa usa ka hamubu nga pagdawat kaniya, gipahigayon gilayon ang usa ka press conference sa Provincial Learning Center, Patin-ay, Prosperidad, Agusan del Sur.
Sa press conference iyang gipadayag ang pagtahan sa paglakaw kauban ang iyang panon.
Iyang gipasabot nga sa maong panaw, dili siya maglakaw nga buta apan maningkamot nga makig-uban sa paglakaw kauban ang iyang panon, sa pakig-ambit sa ilang mga kalipay ug mga paglaum ingon man sa ilang mga paningkamot ug mga kasakit.
Gipadayag usab ni Labajo, ang pasalamat sa mainiton nga pagdawag kaniya sa Agusan del Sur.
Siya nagkanayon nga sa iyang pagsugod sapag-alagad sa bag-ong namugna nga Dayosis sa Prosperidad, nanghinaut siya nga dawaton siya isip usa ka kaubang peregrino, kauban sa pagpanaw diha sa synodal nga dalan paingon sa kalambuan sa pagtoo, paglaum ug kalouy.
Iyang gibutyag ang plano alang sa Dayosis nga magtutuk sa hingpit nga kalambuan sa tawo.
Gihatagan niya ug importansya ang maampingon nga pagplano ug konsultasyon tali sa kaparian inubanan sa pagpaminaw sa mga tambag ni Bishop Almedilla.
Iyang gipasabot nga maminaw siya kanila sanglit iyang gituohan nga anaa ang Balaang Espiritu kanila busa iyang giaghat sila nga kaubang magpanaw.
Sa gabii, usa ka socio-cultural nga programa ug panihapon ang gipahigyon nga nagpasundayag sa mga labing maayo nga mga talento sa probinsiya.
Gipresentar usab sa maong okasyon ang opisyal nga coat of arms ni Bishop Labajo.
Alas diyes ang takna sa buntag sa Enero 28, gipasidunggan ni Bishop Labajo ang kahulogan sa “Prosperidad,” nga naglakip sa espirituwal ug materyal nga kauswagan, ug gihisgutan ang Ebanghelyo ni Marcos 1:21-28. Gipasiugda niya ang gahum ni Kristo nga naghatod sa kalinaw ug kagawasan sa mga tumutuo. Gipahinumduman usab niya ang tanan sa ilang papel sa pagtuman sa kabubut-on sa Diyos ug sa pagsuporta sa simbahan.
Ang makasaysayang seremonya nagtimaan sa usa ka bag-ong kapitulo alang sa mga Katoliko sa Prosperidad, uban ang panaw alang sa espirituwal nga kalambuan ug panaghiusa ubos sa bag-ong lider sa diyosesis.
Gisaksihan kini sa libuan ka mga katawhan sa Prosperidad, Dayosis sa Butuan, Arkidayosis sa Cebu, kaobispohan sa nagkalainlaing dayosesis, Manila Archbishop Cardinal Jose Advincula ug ingon man ni Papal Nuncio Archbishop Charles Brown. (Photos: Roman Catholic Diocese of Prosperidad)
No Comments