
I have not done much
“I have not done much” pipila lamang sa mga pulong nga gibungat ni Sir Lunar Fayloga, magtutudlo sa Ateneo de Davao University, usa sa mga gihatagan og pasidungog atol sa Archdiocese of Davao Diamond Jubilee Celebration. Kini iyang nabungat tungod kay dili siya makatuo nga maapil sa laray nga hatagan og pasidungog. Naglisod siya og tugkad, nganong nahitabo kini kay alang kaniya, gamay pa lamang ang iyang nahimo alang sa uban. Iyang giangkon nga maglisod pa siya sa paghatag ug panahon ug pag-alagad diha ilang Gagmayg Kristohanong Katilingban. Sa kasamtangan, usahay na lang siya makahatag sa iyang presensiya apan isip miyembro muhatag siya bisan gamay nga iyang mahimo.
Sa iyang pagbalik-lantaw, dako kaayo og impluwensya ang GKK kung unsa ug asa na siya karon. Sa iyang pagsaysay, siya nakat-on sa mga pagtulun-an sa simbahan diha sa Flores de Mayo sa kapilya niadtong bata pa siya. Nahimo usab siya nga lider sa batan-on nga maoy nag-umol kaniya sa pagserbisyo ug pag-alagad nga dili maglaum og pasidungog o pag-ila. Nagpasabot nga bisan kaniadto pa, nakiglambigit na siya sa katilingban hangtod siya nahamtong ug padayon karon isip usa ka magtutudlo, magsisibya sa programa sa DXGN, mamumulong sa nagkalin-laing pundok.
Siya makig-istorya, mutagad, makig-uban sa mga estudyante, drayber sa taksi ug trisikad, tindero, basurero ug uban pang mga ordinaryong tawo. Ang iyang pakiglambingit ug paghugoy-hugoy sa mga yanong tawo naghatag kaniya ug oportunidad nga makabati sa ilang mulo nga nakahimo kaniya nga mas mapaubsanon, mas masinabtanon ug mas manggihatagon sa uban.
Si Sir Lunar makita bisan asang panagtapok bahin sa lihok sa simbahan ug mga komunidad. Kini tataw nga ilhanan nga sayon ra siya imbitahon sa mga buluhaton nga sama niini. Oo, siya nailhan nga usa ka yanong tawo, apan aduna pod siyay katakos nga mukuyog sa hugpong sa mga dagko ug inilang personalidad sama sa obispo, mga pangulo sa tulunghaan ug asosasyon, ug pipila ka mga politiko. Sama siya sa usa ka tulay nga mukonekta sa matag-usa, usa ka tulay nga mahimong magamit sa tawo gikan sa nagkalahi-lahing pundok.
Alang sa iyang mga higala ug kauban sa trabaho. nagpabilin siya mga yano ug mapaubsanon bisan pa man sa mga pasidungog nga iyang nadawat. Matinabangon pod siya bisan pa man pit-os, ug labaw sa tanan andam siyang muhatag ug panahon aron maminaw sa making-istorya kaniya.
Usa sa mga hinungdan sa iyang padayon nga paghatag ug pagtagad sa mga yanong tawo mao ang pagpaduol kanila ngadto sa simbahan ug sa Diyos. Ang iyang pakig-istorya kanila makahimo usab kaniya sa pagpaambit sa maayong balita. Ang mga tawong iyang mahimamat, giisip niyang kauban diha sa panaw sa simbahan.
Mapasalamaton usab siya sa mga nagdumala sa unibersidad, kang Fr. Joel Tabora, SJ ug Fr.Karel San Juan, SJ sa paglusad og mga programang makalambigit sa mga komunidad gawas sa tulunghaan. Kini nakapadugang sa iyang kadasig nga mutubag sa tawag aron muserbisyo. Nagpasalamat usab siya sa mga obispo ug mga pangulo sa arkidayosis sa pagpalig-on sa simbahan pinaagi sa ilang matinud-anong pagserbisyo ug paggiya sa katawhan.
Siya naghagit kanato nga kung asa man kita gibutang karon ug unsa man ang atong estado sa kinabuhi, atong himuon ang atong mga buluhaton nga puno sa gugma bisan unsa kana kagamay ug ka simple kay kung naay paghigugma, mamahimo kining buhat nga makapahimuot sa Diyos. Nanghinaot siya nga kitang tanan magpadayon sa pagtabang alang sa kaayuhan sa simbahan, ang katawhan sa Diyos. (Flor Deloria)
No Comments