May Paglaum Pa Ba?

Sulat Pastoral sa Kapunongan sa Kaobispohang Katoliko sa Pilipinas (CBCP) nga nanawagan sa mga Magtotoo alang sa usa ka Panaw sa Pagtoo sa Tuig sa Jubileo sa 2025

Minahal nga Katawhan sa Dios,

Timbaya sa Kalinaw ug Paglaum!

Diha sa paglaum, among gitapos ang ika 129 nga Asembleya Plenaria sa CBCP diin kami namalandong sa panawagan alang sa Transparency and Accountability (o Pamunuan nga walay gitago ug may tulubagon) aron mahimong Simbahang misyonero ug sinodal. Kami usab naghimo og hiniusang pamalandong sa kasamtangang mga realidad nga nakaapekto sa atong nasud sama niining mosunod:

• Sa natad sa moralidad, makaalarma ang pagtumaw sa usa ka kultura sa kawalay-kahadlok sa silot (impunity), ang pag-insistir sa kaugalingong katungod sa way paghunahuna sa uban (self-entitlement), ug ang pagkawala sa konsensiya nga mohimo og sala.
• sa ekolohiya, kita nalisang sa mga epekto sa emerhensiya sa klima
• sa ekonomiya, ang nagkagrabe nga kapobrehon, nga makita sa pagdaghan sa mga walay trabaho, sa pagtaas sa presyo sa mga palaliton.
• sa politika, anaa ang iskandaloso nga pagwaldas sa pampublikong pondo ug bahandi; ang kwestyonable nga pag-maniobra sa nasudnong budget; ang mga programa nga magdasig sa pagpalimos og mga ayuda. Ug samtang ang piniliay nagkadool, makita ang mga plataporma binasi sa popularidad o sa pagpasa-pasa sa gahum nga daw ang politika nahimong negosyo sa pipila ka mga pamilya.
• sa seguridad ug relasyon sa ubang mga nasud, atong nasinati nga ang atong kaugalingnan ug nasudnong kasiguroan kanunay nga gisamok.
• sa komunikasyon, ang bakak gihimong hinagiban batok sa kamatuoran.
• sa panggobierno, kita naglibog kon anaa pa ba ang pagbantay ug pagbadlong sa mga kahiwian.

Tungod niining mga nagpaluyo nga kasinatian, kita makapangutana: “May paglaum pa ba? Kinsa may atong kadangpan?

Diha sa labing ngitngit nga bung-aw sa kamatayon, si Jesukristo atong Manluluwas, misulod sa kamatayon ug iya kining gibag-o pinaagi sa makaluwas niyang gugma. Ang gugma molagbas sa kangitngit ug mopadayag sa mga hulagway sa paglaum. Makita nato ang kidlap sa paglaum…

• diha sa mga pangulo nga ginamhan sa prinsipyo ug molaban sa maayong pangagamhanan.
• diha sa lunsay nga pangandoy sa atong mga kabatan-onan ug responsableng mga lumulupyo nga dili magbaligya sa ilang mga damgo ug gugma sa nasud.
• diha sa libreng pakigtambayayong sa mga NGO, mga organisasyong sibiko ug relihiyoso nga motabang sa goberno sa panahon sa katalagman ug kalamidad.
• diha sa mga lokal nga kalihukan ug paningkamot aron paghatag og gahum sa mga komunidad alang
  sa kabag-ohan.
• diha sa publiko, relihiyoso, mga pangulong militar ug sibiko, mga ordinaryong mamumuo nga adunay kaakuhan sa usa ka sinsero nga serbisyo bisan kon walay pasidungog o ganti.
• diha sa responsableng mga kalihukan sa negosyo nga naglantaw sa paglaban sa kinaiyahan ug moalagad sa mga nanginahanglan.
• diha sa mga tawong andam ibutang sa peligro ang ilang dungog, bisan ang ilang kinabuhi, aron pagbatok sa pangurakot ug aron pagpatunhay sa hustisya.
• diha sa Pilipinhong diwa sa paglahutay taliwala sa mga pag-antus, ug diha sa mga tawong nagtahan sa ilang kaugalingon alang sa tiunay nga pag-alagad bisan kon sila mismo gilumsan sa ilang kaugalingong panginahanglan.

Kita mag-ampo uban ni Papa Francisco: “Ang Imong grasya magbag-o unta kanamo aron dili kapuyong pag-ugmad sa mga binhi sa Ebanghelyo. Ang maong mga binhi magbag-o unta sa among kasingkasing ug sa tibook kalibutan diha sa pagpaabot sa usa ka bag-ong langit ug bag-ong yuta sa panahon nga ang mga gahum sa kadautan mapukan, ang imong himaya mosanag hangtud sa kahangturan” (Papa Francisco, Pag-ampo sa Jubileo).

Atong isalig ang atong panaw ug lawig sa pagtoo, isip Katawhang Pilipinhon, uban sa atong mga kasakit ug damgo ngadto sa mga kamot sa atong Bulahang Inahang Maria, ang Rayna sa Paglaum, aron iya kitang ubanan ug giyahan samtang kita nagasunod sa Dalan ni Jesus, atong Ginoo. Amen.

Alang sa Kapunongan sa mga Kaobispohan Katoliko sa Pilipinas,

+PABLO VIRGILIO S. CARDINAL DAVID, D.D.
Obispo sa Kalookan
Presidente sa CBCP
Febrero 2, 2025
Kapistahan sa Paghalad sa Ginoo

Translated to Cebuano from the original version of this CBCP Pastoral Letter