DCH Pamalandong

Pagbaton sa Paglaum

Ika-5 nga Domingo sa Ordinaryong Panahon (February 9, 2025)
Isaiah 6:1-2a, 3-8 / Psalm 138:1-2, 2-3, 4-5, 7-8 / 1 Corinthians 15:1-11 / Luke 5:1-11

Nakasinati ka na ba nga naghago apan walay nakuha? Nasulayan mo na ba nga nagkugi apan walay naani? Wala ka ba mawad-i sa paglaum?

Niining tuig sa hubileyo, tuig sa paglaum, si Santo Papa Fracisco nagkanayon, “Diha sa kasingkasing sa matag tawo, ang paglaum anaa ingon nga ang tinguha ug pagpaabut sa maayong mga butang nga moabut, bisan pa nga wala nato nahibaloi kon unsa ang mahitabo sa umaabot.”

Mao kini ang nahitabo diha sa mga tinun-an diha sa Ebanghelyo. Wala sila nawad-an sa paglaum. Hinonoa, misunod sila sa pulong ni Jesus nga magpalawod ug itaktak ang ilang pukot. Ug sila nakakuha og daghan kaayong isda. Ang tawo nga malaumon masinugtanon sa mando sa Dios. Siya nasayod nga bisan lisod o imposible, ang Dios moganti ra kaniya sa angay ug sa hustong panahon. Dili siya magtuman sa iyang panglantaw. Dili siya magpabiling magahi sa iyang panabot. Abli siya nga mosunod.

Nasinati usab kini diha sa unang pagbasa sa basahon ni Propeta Isaias. Dili kita makaingon nga wala kitay paglaum. Dili kita maghunahuna nga alaot kita. Kini tungod kay gipapas sa Ginoo ang atong mga sala. Misalig Siya kanato. Gipili kita niya ug gipadala kita aron magsangyaw sa iyang pulong. Mao nga molaum usab kita kaniya.

Sama sa unang sulat ni San Pablo ngadto sa mga taga Corinto diha sa ikaduhang pagbasa, kita nahatagan sa grasya. Dili unta kita angayan apan gihimo kitang takos tungod sa gahum sa Dios nga kita mosaksi Kaniya pinaagi sa atong pagtoo ug maayong buhat. Sa unsa mang ginagmay ug yano nga pamaagi, ang atong kiniya mahimo unta nga salamin sa kaayo sa Ginoo.

Busa, atong hinumdoman nga walay santo nga walay kagahapon ug walay makasasala nga walay kaugmaon. Walay kabos nga walay ikahatag ug walay adunahan nga wala nanginahanglan. Santo man kita o adunahan, kini tungod sa grasya sa Dios. Makasasala man kita o kabos, gigrasyahan ug gibuhong kita sa Dios. Kini tungod sa iyang dakong gugma kanato diin nagsukad ang atong paglaum. Kang Kristo nga nabanhaw, kaniya ug siya ang atong paglaum. “Kung wala si Kristo, walay paglaum ang kataposan. Kung anaa si Kristo, walay kataposan ang paglaum.”

No Comments

Post A Comment