Pagkamanggihatagon

Nag-awas ang parokya sa Virgen de los Remedios sa Crossing Bayabas Toril sa mga nanimba sa lima ka misa nga gisaulog atol sa ika-14 nga kapistahan sa Candelaria ug ang paghalad sa Diosnong bata sa templo kaniadtong Pebrero 2, 2025 nga may tema na “A journey of hope: We are a pilgrim people. We are VDLRP!” Duyog usab sa pagsaulog sa World Day for Consecrated and Religious Life. Adunay panalangin ug pag-ampo sa kandila una gisugdan ang misa.

Sa Pontifical Mass nga gisaulog sa atong Halangdon nga Arsobispo sa Davao Most Rev. Romulo Valles, D.D. Nagpadayag nga si Kristo mao ang simbolo sa kahayag ug naghatag kanato sa paglaom nga dili mapakyas kay kung naa si Kristo sa atong kinabuhi sama kita sa plata ug bulawan nga mapino ug mahinlo aron mahimong angayan sa gugma, kalooy ug kahayag ni Kristo.

Human sa ika-tulong misa gisunod na ang mga kalihokan alang sa pagsaulog sa kapistahan. Usa gipanalanginan ni Fr. Anthony “Don” Silvosa ang mga pagkaon nga giambitan sa mga GSL’s ug parokyano. Naghatag siya’g mensahe sa tanan nga ang parokya sa Virgen de los Remedios ang unang parokya nga iyang gidumala ug kini magpabilin sa iyang kasingkasing kay mao na kini ang katapusang kapistahan nga anaa siya usa siya mabalhin sa laing parokya. Dugang pa niya nga wagtangon na ang kasuko ug pagdumot. Makita ang kahingawa sa panagway sa matag usa tungod sa dakong nahimo ni Fr. Don alang sa kalamboan sa parokya ug ang pagkamanggihatagon ngadto sa katawhan.

Malipayon ug mapasalamaton ang tanan tungod kay daghang mga gamit sa panimalay ang gipa raffle ni Fr. Don ug aduna usab cash nga gilakip. Nahimong mabulokon ang pagsaulog kay tanang distrito nag-andam ug nagpaambit og nagkalain laing putahe sa sud-an. Gisorpresa usab ang tanan sa lechon nga gipanghatag ni Fr. Don sa matag GKK.

Adunay parlor games ug contest sa folk dance nga gisalmotan sa 5 ka distrito. Nakab-ot sa Distrito 2 ang kadaogan sa folk dance diin si Fr. Don ang naghatag sa dakong premyo. Labihan usab kalipay ang mga PSL tungod kay gihatagan ang matag usa kanila nga niapil sa exhibition game construction worker versus VDLRP PSL. Napuno sa kalipay ang kasingkasing sa matag usa nga nagmalampuson ang pagsaulog sa kapistahan sa Virgen de los Remedios.

Viva Maria! Viva Hesus!

(By Llibeth Sancover)