
Political Values Education – Tumong Sa A.C.E. Com
Usa ka Values Development Program alang sa Modelong Pilipino ang tutukan karon alang sa pagporma sa katawhang Pilipino alang sa umaabot nga Midterm nga piniliay ug sa umaabot pa nga mga eleksyon.
Sa milabay nga mga piniliay, gihatagan ug gimbug-aton sa Archdiocesan Citizens Engagement Committee kon A.C.E. Com sa Arkidayosis sa Dabaw ang pagpamalandong kon discernment alang sa pagpili sa mga midagan sa eleksyon.
Ang A.C.E. Com maoy gitahasan sa Parish Pastoral Council for Responsible Voting kon PPCRV gikan pa sa milabay nga eleksyon nga maoy citizens arm alang sa Arkidayosis sa Dabaw.
Pinaagi sa pagtugot sa Arsobispo nga si Most Rev. Romulo G. Valles, gipanguluhan ang A.C.E. Com sa Archdiocesan Social Action Center (ASAC) ubos sa direksyon ni Rev. Padre Leonardo ”Bong” Dublan, Jr. sa pakigtambayong sa E-CHAMP kon ang Election for Clean, Honest, Accurate, Meaningful, and Peaceful nga gilangkuban sa mga Katolikong Tulunghaan kon sa Davao Association of Catholic Schools (DACS) nga gidumala ni Mr. Jimmie Loe Dela Vega, isip Executive Director.
Gitahasan karon ang Theology Department sa Ateneo de Davao University pinaagi kang Mr. Lunar Fayloga nga maoy magmugna ug values formation module base sa lima ka mga mithi nga gidusu sa PPCRV nga maoy basehan sa maong katuyuan sama sa MAKA-DIYOS, MATAPAT, MAGALANG, MASIPAG/MATULUNGIN, MAKABAYAN.
Inay nga itumong sa mga nagpapili, ang mga mithi gitumbok alang sa mga botante ug sa mga mamahimong botante ugma damlag.
Gimugna sa A.C.E. Com ang upat ka mga Facilitators teams nga maoy bansayon aron nga mopadagayday sa political values formation modules. Gitakdang pagahimoon ang dungan nga paghatag sa tagurha ka mga bikaryato sa maong module sa Political Values Formation Trainors Training sa Pebrero 2, 2025, sa mosunod nga mga dapit:
- San Pablo & Sto. Rosario: Jesus and Mary Thevenet School
- St. James & IC (Island): St. Joseph the Worker Parish
- La Purisima & Sacred Heart: ICP Mintal Parish
- Sta. Ana & San Pedro: St. Jude Shrine Parish
Sa sulat nga gipirmahan ni Reb. P. Dublan alang sa mga kura paroko ug parish vicars, iyang gipasabot nga sa Mayo 12, 2025, pagahimoon sa tibuok nasud ang National, Local ug BARMM Elections busa sa makausa pa, gipalihok ang A.C.E. Com aron sa pagtabang sa pagsalmot sa maong mahinungdanon nga kalihukan.
Busa, gihangyo ang suporta ug kooperasyon sa uban pang mga ministriya sa arkidayosis aron tumanon ang misyon sa pagsangyaw diha sa natad sa pulitikanhong kinabuhi isip usa ka nasud.
Gawas sa maong Political Value Formation, abli na ang pagdawat sa mga mo-boluntaryo atol sa adlaw sa eleksyon aron motabang sa Voters Assistance Desk (VAD), Poll Watching, Monitoring, ug ingon man ang Reporting. Giawhag ang tanan nga makisayod sa tagsa-tagsa nila nga mga Parokya.
Pakusgan usab ang information dissemination pinaagi sa media sama sa DXGN 89.9 Spirit FM ug sa Davao Catholic Herald ug social media sa mga programa ug mga plugs kalabot sa piniliay.
No Comments