Tatay Simo: Bililhong Handumanan ug Istorya sa Paglahutay

Si Felicisimo B. Pedrosa Sr., mas nailhan sa tawag nga “Tatay Simo,” usa sa mga napiling Diamond Jubilee Awardee alang sa pagsaulog sa ika-75 nga Anibersaryo sa Archdiocese of Davao niadtong tuig 2024. Gisaulog ang iyang bililhong pag-alagad sa Parokya ni San Roque sa Malabog, diin siya gikan sa GKK San Isidro Labrador, Upper Calcal, diin kaniadto nahisakop sa Parokya sa Hamiling Kasingkasing ni Jesus sa Calinan.

Ang Sugod sa Pag-alagad

Nagsugod si Tatay Simo sa pagpangalagad niadtong 1973 isip usa ka KSP Leader sa ilang GKK. Sa miaging napulo’g-duha ka tuig, nahimo siyang kabahin sa maong parokya hangtod sa pagbalhin niini ngadto sa Parokya ni San Roque sa Malabog, Davao City. Nakasinati siya og mga hagit ug kasakit nga dili malimtan. Bisan pa man sa kalayo ug kawad-on, gipadayon niya ang iyang misyon uban sa dakong pagtuo nga dili siya ang nagkupot sa Ginoo kondili ang Ginoo ang nagkupot kaniya aron molahutay sa pag-alagad sa katilingban.

Mga Pagsulay ug Panagway sa Pagtuo

Dili malikayan ang mga pagsulay sa kinabuhi ni Tatay Simo. Usa ka makapasakit nga kasinatian mao ang pagkawala sa iyang anak nga usa ka dakong kasakit nga wala niya damha. Sa tuig 1991, nasinati usab niya ang kasakit sa pagpanaw sa iyang mahal nga asawa, si Mrs. Warlita Pedrosa, tungod sa sakit nga kanser. Sa taliwala sa kasakit ug kabalaka, bisan pa man sa kakulang sa presensya sa panimalay ug sa kahimtang sa iyang mga anak, napakita niya ang tinuod nga pagtuo ug pagsalig sa Ginoo. Sa iyang pamalandong, nahimo niyang mahinumduman nga bisan sa kakulang sa mga hinigugma, ang ganti sa pag-alagad makita sa kinabuhi sa mga tawo nga iyang nahikap ug sa komunidad nga iyang natukod.

Ang Pagpadayon sa Pag-alagad

Sulod sa kapin 51 ka tuig nga pagpangalagad, si Tatay Simo nahimong ehemplo sa pagka-aktibo sa misyon sa Simbahan. Gitudlo niya nga bisan pa man sa kalisod, ang regular nga pagsimba—ang pagdawat sa Santos nga Misa ug pagkalawat sa Lawas ug Dugo ni Kristo—maoy nagpahugot sa iyang pagtuo ug naghatag kaniya og kusog nga molahutay. Nahimo siyang (PSL) Pangulo sa Liturhiya sa GKK San Isidro Labrador, Upper Calcal, Zone 8, ug GKK Coordinator sa Parokya ni San Roque, Malabog.

Sa iyang mga kauban sa simbahan ug sa komunidad, si Tatay Simo nagpaambit sa iyang mensahe:

“Dili ta muhonong bisan pa sa mga kalisdanan. Ang matag pag-alagad nga malipayon, magmalahutayon. Ang pagtuo ug pagsalig sa Ginoo magpahugot sa atong panaghiusa, ug ang matag gamay nga buhat sa pagkamanggihatagon magdugang sa panulondon sa Simbahan.”

Pagtan-aw sa Umaabot

Ang pagdawat ni Tatay Simo sa dungganong Diamond Jubilee Award dili lamang usa ka pasidungog sa iyang kinabuhi apan usa ka inspirasyon sa mga umaabot nga henerasyon. Nag-awhag siya sa tanan nga magpadayon sa misyon nga gisugdan nato sa bunyag—ang pagka-pari, pagka-hari, ug pagka-propeta sa atong pag-alagad. Bisan pa sa mga pagsulay ug kalisod, ang dakong pagtuo sa Ginoo magpabilin nga maghatag og kadasig ug paglaum alang sa atong komunidad.

Sa pagtan-aw ni Tatay Simo, ang matag ganti makita sa mga kinabuhi nga iyang nahikap ug ang pagbag-o nga iyang nakita sa mga tawo usa ka dakong grasya. Kini nga panaw sa pag-alagad, bisan puno sa mga pagsulay, magpabilin nga usa ka suga nga magdala og kainit ug inspirasyon sa atong simbahan ug sa katilingban.

Dalaygon ang Dios!

(By Arlene Tarnate and Jozeil Crodua)