Unsa May Hagit?

Ang ika-44 nga piyesta sa GKK Sr. Sto. Niño sa SIR Phase 2 gipahigayon niadtong Enero 18 sa alas nuwebe sa buntag. Sa homiliya ni Rev. Fr. Roy Vincent Husain, MLCC, gitimbaya niya ang mga mitambong sa misa pinaagi sa pag-awit ug pagpanawag, “Viva Señor Santo Niño! Viva pit Señor! Malipayong piyesta sa tanan!”

Gisaysay ni Fr. Husain ang kahulugan sa pagka-devotee ni Señor Santo Niño. Sumala niya, ang pagka-devotee dili lamang makita sa pagsaulog sa piyesta, sa pag-adto sa misa matag Biyernes ug sa mga espesyal nga okasyon, o sa pagnovena bisan wala pa magsugod ang kapiyestahan. Ang tinuod nga hagit mao ang pagkinabuhi nga sama ni Señor Santo Niño—usa ka kinabuhi nga puno sa pagtuo, pagpasalamat, ug pag-alagad.

Dugang pa niya, “Unta sa inyong pagsimba, ang tibuok pamilya mag-uban ug magkahiusa sa pag-adto sa simbahan aron sa pagsimba, pagdayeg, og pagpasalamat sa Diyos.” Gitagaan usab ug gimbug-aton ni Fr. Husain ang kamahinungdanon sa pagpalambo sa pagtuo sa mga kabataan pinaagi sa regular nga pag-adto sa simbahan, dili lamang sa mga espesyal nga okasyon kundili matag Domingo. Kinahanglan nato nga sundon ang Dios, magmatinahuron, ug tabangan ang mga kabataan nga masabtan ang tanan mahitungod sa Dios.

“Kung tudluan unta ta sa insakto nga paagi sa pagpaminaw ug pagtimbang-timbang sa pulong sa Dios, mahibal-an nato nga ang tinuod nga pagsunod nagpasabot sa pagpamati,” ang iyang giingon. Sa katapusan, gipadayag niya, “Mga igsoon ko diha ni Kristo, isip mga devotee ni Señor Santo Niño, hinaut nga ato untang mapuy-an ang mga mithi ug mga hiyas sa atong balaang Bata nga si Hesus.”

Ang mensahe ni Fr. Husain nagpahinumdom sa tanan nga ang pag-alagad ug pagkinabuhi nga puno sa pagtuo mao ang tinuod nga diwa sa pagkadiyosnon. Dili lang kini usa ka ritwal, kondili usa ka paagi sa pagpahayag sa atong gugma ug pagpasalamat sa Dios. (Donn D. Dato | Assumption College of Davao Immersionist)