Ang Kahugno-an Sa Pamilya, Kapukanan Sa Katilingban

Kini mao ang kamatuoran sa kinabuhi ug sa kalibutan. Napamatud-an na kini sa kasaysayan sa kalibutan nga importante ang pamilya diha sa “wholeness” sa tawo ug diha usab sa paglahutay sa “order” o kahan-ay sa kalibutan. Apan tataw nga namiligro na ang dagan sa pamilya karon. Gani dunay gitawag nga “alternative family set-up.” Ang magtiayon dunay binuhi nga iro, gitratar nga anak nila ug gitawag nga sila pamilya. Same sex union, dunay gi-ampon nga bata, pamilya na sila. Unsa na kaha ang pagsulod sa A.I. – Artificial Intelligence nga naa nay mga humanoid robots, mao na kaha ni ang mo papas sa natural family?

Walay duda nga si San Jose, bana ni Maria mao ang ultimate protector sa pamilya. Gidumala, giamoma ug gimatuto niya si Hesus sa maong pamilya. Mao usab kini ang gipiyal sa Dios Amahan kaniya, nga imatuto niya si Hesus diha sa Pamilya sa Nazareth. Dili lalim nga tahas ang pag-umol sa Batang Hesus ug pagprotektar sa inahan sa Dios. Isip amahan, lisud dumalaon ang mga kauban mo sa panimalay nga hawud pa sa imo. Lisud tudlo-an ang mga balaang tawo mahitungod sa pagsunod sa kabubot-on sa Dios. Apan si San Jose nagmalampuson niini kay si Maria ug Hesus niila man kaniya nga haligi o ulo sa ilang panimalay. Nagmasinugtanon si Hesus ug nagmahigugmaon si Maria kaniya.

Unsa ang sekreto ni San Jose? Ang iyang ka mapaubsanon, maalagaron sa gugma, pagpailob, kabuotan ug pagka-maablihon kanunay sa Dios Amahan. Gani kon tan-awon nato, siya wala lamang gipiyalan sa pamilya sa Nazareth kondili sa Kinatibuk-ang Simbahan – protector of the church – nga mao ang pamilya sa Dios.

Busa kon giila nato si San Jose isip bana ni Maria nga mao usab ang nagmatuto kang Hesus, iya gayud nga gipoy-an ang iyang pagka-MAAYONG PINIYALAN sa Dios. Sumbanan siya sa tanang amahan sa atong katilingban. Ma padre de pamilya o ma padre de pari man… mosuon kita kang San Jose. Ang iyang pagka-manggihatagon sa kaugalingon alang sa uban dili masukod kay hangtud karon, dalangpanan man siya sa unsa mang matang sa mga panginahanglan sa pamilya – ADTO O DUOL KANG SAN JOSE (Go to St. Joseph).

Busa sa atong kabalaka kon maunsa na ang mga pamilya sa umaabot, dangop kita kang San Jose. Karon nga naa nay “alternative families” o sa umaabot naa nay “humanoid families” pakusgan nato karon ang pagconvert sa atong mga pamilya ngadto sa “Josephite Family” aron kita molahutay sa pagka-malig-on nga pamilya kay siya mao ang piniyalan sa pamilya sa Dios. (Rev. Fr. Leonardo Dublan, Jr.)