BSSW Interns sa Lumondao

Niadtong Marso 8, 2025, human sa Santos nga Misa sa binuwang panagtigom sa mga pangulo sa Parokya sa San Isidro Labrador, pormal nga gidawat ang katorse ka mga estudyante sa BS in Social Work gikan Holy Cross of Davao College, Inc. nga mohimo sa ilang Internship/work immersion sa komunidad nga sakop sa Parokya. Sila gipaila-ila sa mga pangulo sa Parokya uban sa ilang mga mentors nga naghatud kanila sa Parokya nga sila Ms. Daisy Dramayo, SMAC-Agency Field Instructor; Ms. Cirila Lilibeth A. Panes, RSW, MASW-HCDC BS in Social Work Chairperson; Ms. Raquel Nuñez, RSW-Field Instructor Coordinator; Mr. Glien Norbe, RSW, MAT, BFCC-School Field Instructor.

Gipahigayon ang pagdawat kanila pinaagi sa Rite of Commissioning pinanguluhan sa Padre Kura, Rev. Fr. Dexter Veloso nga mao usab ang Archdiocesan Migrants Director uban sa Migrant Coordinator sa Parokya – Rose Hundit, Zone Coordinator nga maoy moatiman sa mga interns atol sa ilang pagpuyo sa zona.

Sila gipadala isip pilot group alang sa katuyoan sa pagtigom ug mga datos nga may kalabutan sa kahimtang sa mga OFW ug sa ilang pamilya nga nahibilan sa Pilipinas. Ang mga datos nga matigom sa mga interns gamiton alang sa pagmugna og mga programa nga mas makatabang ug mas mupalig-on sa ministriya sa pag-atiman sa mga OFWs ug sa ilahang pamilya.

Ang mga social work interns mopuyo uban sa pamilya nga adunay miyembro nga nilangyaw (OFW), sila mosinati sa kinabuhi uban sa maong pamilya. Aduna usab silay mga questionnaire nga giya sa ilang pagtigom og mga datos. Gibahin sa duha ka GKK sa Zona 9 ang katorse ka mga interns aron mosinati sa kahimtang sa nagkalain laing pamilya sa OFW.

Ang ilang work immersion molungtad og tulo ka bulan ug sila mosinati sa nagkalain lain kahimtang sa mga pamilya sa OFW nga nahibilin. Sa sulod sa tulo kabulan adunay nagkalain laing zona ang modawat kanila. Ang Holy Cross of Davao College, Inc. ug ang Episcopal Commission on Migrants and Itinerant People sa Arkidyosis sa Dabaw nagtambayayong aron mapadayon ang mga tumong sa duha ka institusyon nga mamahimong socio-economically, psychologically, spiritually, academically updated ug may kalabutan sa sitwasyon sa mga pamilya sa mga OFW.

Malipayon ang Parokya sa San Isidro Labrador Lumondao isip nga mamahimong pilot area sa pagahimoong pagtigom ug mga datos. Gilauman nga ang mamahimong resulta sa survey ipaambit sa CBCP alang sa pagmugna ug mga programa nga makatabang sa mga pamilya sa OFW nga nahibilin sa ilang mga pinuy-anan.

Ang mga pangulo sa matag GKK sa San Isidro Labrador Lumondao nag ampo ug nanghinaut sa kalampusan sa work immersion sa katorse ka mga social work interns.

DALAYGON ANG DIOS!

(By Echerica U. Yamba | SILP Lumondao SocCom Coordinator)