Espiritwal nga Kasinatian

Mainiton nga gidawat sa komunidad sa parokya si Most Reverend Romulo Valles, D.D., Arsobispo sa Davao, alang sa iyang tulo ka adlaw nga pastoral nga pagbisita. Ang unang adlaw napuno sa pagtuo, pagpamalandong, ug makahuloganong panag-istoryahanay kauban ang mga parokyano sa St. James the Apostle Parish, mga miyembro sa PPC, GKK Zone Leaders, ug mga organisasyon sa Parish Center.

Niabot ang Arsobispo sa alas-5:15 sa hapon, diin siya gidawat nga may dako nga pagtahod ug kalipay. Ang pagdawat kaniya napuno sa makapahingangha nga kasadya, mga kolor nga dekorasyon, ug mainiton nga pag-abiabi sa katawhan.

Sa alas-5:30 sa hapon, nagsugod ang Welcome Rite, diin daghang tawo ang misugat kaniya lakip na ang mga pamilya, estudyante gikan sa Holy Cross, mga madre, ang prinsipal sa maong eskwelahan, Holy Cross of Bunawan, mga trabahante, ug daghan pa. Kini usa ka mainit nga pagdawat nga puno sa kahayag ug malipayong kasingkasing.

Sa alas-5:45 sa hapon, nagsugod ang Santos nga Misa, diin nagkatigom ang mga magtutuo aron sa pagpahugot sa ilang pagtuo ug pagpasalamat sa Dios.

Sa alas-6:45 sa hapon, gisundan kini sa usa ka salo-salo nga panihapon, nga naghatag og higayon sa komunidad nga magkahiusa ug maglig-on sa ilang panag-ambit isip usa ka pamilya sa pagtuo.

Pag-abot sa alas-7:45 sa hapon, nagsugod ang Himamat with Bishop Muloy. Nagsugod kini sa usa ka mainit nga opening remarks ni Father Rolando O. Mandreza, gisundan sa usa ka Opening Salvo diin ang mga animator misayaw sa Hiraya.

Usa sa mga labing gipaabot nga bahin mao ang Question and Answer session:

Si Mr. Sarile nangutana kung giunsa magapadayon sa pag-alagad sa Dios taliwala sa pagsulay, nga gitubag ni Bishop Muloy uban sa kaalam ug pagpadasig. Si Mrs. Bing Tabacon nangutana bahin sa premarital sex ug pagpuyo nga walay kasal, samtang si Mrs. Romo naghisgot sa sayong pagpamabdos—gihatagan sila ni Bishop Muloy og tin-aw ug lig-on nga tambag.

Sa Sharing Session, si Mam Perez, kapin sa 80 anyos, mipakigbahin sa iyang lig-on nga pagtuo, samtang si Ms. Rhea mipadayag sa kaayo sa Dios sa iyang kinabuhi ug sa pagpangalagad sa iyang pamilya sa Simbahan. Natapos ang unang adlaw nga puno sa inspirasyon ug kalipay.

PASTORAL VISIT 2025: HIMAMAT SA PARISH STAFF

Ang ikaduhang adlaw sa Pastoral Visit 2025 usa ka espesyal nga panagtagbo kauban si Archbishop Romulo G. Valles, D.D. Napuno kini sa espiritwal nga panaghiusa ug kalipay.

Pagpirma sa Canonical Books

Sa alas 5:00 sa hapon, gipangulohan ni Bishop Muloy ang pirmahanay sa Canonical Books—usa ka sagrado nga buhat sa Simbahan nga nagpakita sa padayon nga misyon sa espiritwal nga pag-alagad.

Himamat ug Panag-ila

Nagpa-ila ila ang parish staff kang Bishop Muloy, nga naghatag higayon sa mas personal nga panag-istoryahanay ug panaghiusa isip mga alagad sa Simbahan.

Panihapon ug Pagtapos sa Adlaw

Sa alas 7:00 sa gabii, usa ka mahigalaong panihapon ang nagtapok sa tanan, nagpakita sa kusog nga panaghiusa ug pagtinabangay sa Simbahan.

Ang Himamat sa Parish Staff usa ka kalampusan, nga nagpasiugda sa importansya sa espiritwal nga panaghiusa ug pag-alagad sa komunidad.

PASTORAL VISIT 2025: HIMAMAT SA GKK

Sa Marso 15, Sabado, natapos ang Pastoral Visit 2025 sa usa ka mahimayaong panagtagbo kauban ang GKK Leaders ug si Bishop Muloy. Kini usa ka gabii nga napuno sa espiritwal nga gugma, panaghiusa, ug pasalamat sa panalangin sa Dios.

Sa alas 4:00 sa hapon, mainit nga gidawat si Bishop Muloy sa Parokya ug mipadayon sa biyahe padulong sa GKK. Pag-abot sa alas 4:30, usa ka sagradong Balaang Misa ang gipahigayon sa GKK Chapel, diin ang katawhan nakighiusa sa pag-ampo ug pagpasalamat. Pagkahuman sa Misa sa alas 5:30, gisugdan ang Himamat kauban ang GKK Leaders, usa ka mahigalaong panag-estoryahanay nga nagpalig-on sa panaghiusa isip usa ka komunidad sa pagtuo. Ang gabii natapos sa usa ka mabungahong Panihapon sa alas 6:30, nga nagdala og kalipay ug pagpasalamat sa Dios.

Kini nga ikatapusan nga adlaw sa pastoral visit usa ka hinungdanong pahinumdom sa gahum sa panaghiusa, pagtuo, ug walay puas nga panalangin sa Dios.

“Daghang Salamat, Bishop Muloy, sa imong gugma, kadasig, ug walay puas nga pag-alagad sa Simbahan! Sa tanang mitampo sa kalampusan ning tulo ka adlaw nga kalihukan, DAGHANG SALAMAT KANINYONG TANAN!”— Rev. Fr. Rolando Mandreza, Kura Paroko. (Angelo P. Marqueza | Photos: Santiago Apostol Bunawan FB)