Gibag-o sa Grasya: Pagdawat sa Atong Kausaban

Ika-2 Domingo sa Kwaresma (March 16, 2025)
Genesis 15:5-12, 17-18 / Psalm 27:1, 7-8, 8-9, 13-14 / Philippians 3:17-4:1 / Luke 9:28b-36

Sa atong pagpamalandong sa pagkausab sa dagway ni Hesus sa Ebanghelyo, atong makita ang usa ka daklit nga pagtan-aw sa atong kaugalingong pagkakabig. Gidapit kita sa usa ka pagbag-o sa sulod sa atong kasingkasing nga makabag-o sa atong kinabuhi sa hingpit.

Ang unang lakang mao ang paglakaw uban sa atong Ginoo. Nahibal-an nato nga kining paglakaw dili sayon. Nasayud usab kita nga ang Dios mohatag sa tanan natong panginahanglan. Sa paghinumdom sa atong mga kinabuhi, kinahanglan natong ilhon nga ang Dios naglakaw uban kanato niining tanan nga dalan ug nga Siya naglakaw gihapon uban kanato karong adlawa.

Pipila lang ka disipulo ang gidala ni Hesus didto sa bukid apan wala kini magpasabot nga pipila lang kanato ang makasinati sa Ginoo sa Iyang himaya isip anak sa Diyos. Kita usab mga anak sa Dios. Kitang tanan mausab. Mahimong magduhaduha kita o mahadlok pa gani kon asa kita dad-on ni Hesus. Bisan pa, makaingon gihapon kita, maayo nga ania kita nag-uban sa Ginoo.

Pinaagi sa mga kasinatian nga sama niini nahatagan kita og kusog nga atong gikinahanglan sa pagsagubang sa mga hagit ug kalisdanan sa kinabuhi. Ang pagkausab sa dagway ni Hesus usa pa ka oportunidad alang kanato nga madungog ang tingog sa Dios nga nagtawag kanato nga mahimong tinuod nga mga anak sa Dios.

Sa atong pagkat-on nga makaila, mahigugma, ug mag-alagad sa Ginoo, mas molig-on ang atong relasyon Kaniya. Ang pagmatuod kang Hesus isip anak sa Diyos ug ang pahayag sa pagpaminaw kaniya naghagit kanato sa pag-abli sa atong kasingkasing ug dalunggan ngadto sa nagbag-o sa atong kinabuhi. (Br. Ignatius Gonzales, CFA)