LCCP – Mga Pilgrimo sa Paglaum

Ang LCCP (Lectors, Commentators, Choir, Psalmists) sa Archdiocese sa Davao nagpahigayon og usa ka konbensyon niadtong Marso 1, 2025 (Sabado) sa Regional Major Seminary (REMASE) Gym, Catalunan Grande, Davao City. Kini mao ang ika-14 nga LCCP convention ug usa ka higayon sa pagpabag-o sa espirituhanong misyon sa mga nag-alagad sa liturhiya. Kapin-kulang 2,600 ka miyembro gikan sa nagkalain-laing parokya sa Archdiocese sa Davao ang mitambong sa maong panagtapok.

Mga Mag-aawit ug Magpapahayag sa Paglaum

Gisugdan ang kalihokan sa Santos nga Rosaryo, gisundan sa welcome remarks ni Ms. Rowena Nuera, LCCP President, ug Rev. Fr. Michael Ondras, Jr. Gipa-ila usab ni Doc. Vergloure Maguinsay, LCCP Adhoc Committee member, ang resource speaker nga si Rev. Fr. Edilberto Mahinay, nga naghatag og pabilin nga mensahe, “LCCP: Men & Women of Hope”.

Sa iyang pamulong, gihatagan niya og gibug-aton ang dokumentong “Spes Non Confundit”, nga nagpasabot nga “Hope does not disappoint.” Gipahayag niya nga bisan pa sa daghang hagit nga giatubang sa Simbahan, kinahanglan nga magapadayon kita sa atong paglaum. Ingon nga mga mag-aawit ug magpapahayag sa liturhiya, adunay dakong papel ang LCCP sa pagdala sa maayong balita ug sa buhing presensya sa Ginoo.

Ang LCCP isip “Microphone sa Dios”

Sa Santos nga Misa, nga gipangunahan ni Archbishop Romulo G. Valles, D.D., gipasabot niya ang bililhon nga tahas sa LCCP sa liturhiya. “Kung ang Bibliya mabasa sa liturhiya, kini ang Dios mismo ang nagapamulong, dili ang nagbasa. Ang LCCP mao lamang ang mikropono sa Dios,” iyang giingon.

Gidugang usab sa Arsobispo ang kamahinungdanon sa pagpabilin nga kalipay sa pagpangalagad, tungod kay ang tinuod nga paglaum walay kataposan. “Ingon nga mga sulugoon sa Ginoo, dili kita angay mawad-an og paglaum. Ang kalipay sa pagpangalagad mao ang dakong grasya sa katawhan,” iyang gihatagan og gibug-aton.

Pagtubo sa Pag-alagad ug Pagpakabana

Human sa Misa, nagkauban ang mga LCCP sa panihapon ug pagpangapil sa Breakout Sessions, diin gilain-lain ang mga ministro aron sa pagpalawom sa ilang kaalam ug kahanas:

• Para sa LCM (Lectors and Commentators Ministry):
  • Art of Proclamation – Rev. Fr. Ritsche Gamaya
  • Speech Competency – Atty. Grecel Paclipan
  • Spirituality of the Proclaimer – Rev. Fr. Pepe Retorca
• Para sa MM (Music Ministry):
  • Musical Instruments in the Liturgy – Rev. Fr. Reynaldo Retardo
  • Group & Individual Singing – Emmanuel Nikko Tagle
  • Learning Liturgical Songs – Rev. Fr. Henry Escasinas

Ang matag sesyon naghatag og bag-ong panabot ug kahibalo sa mga partisipante, nga nagapalig-on sa ilang pagtulun-an ug espirituhanong panaw isip mga LCCP.

Human sa plenary session ug synthesis sa mga topics, malampusong natapos ang maong panagtigom. Ang matag miyembro sa LCCP namalik sa ilang tagsa-tagsa ka parokya dala ang nagadilaab nga gugma sa Dios ug ang lig-on nga paglaum sa ilang misyon sa pagpangalagad.

Ang 14th LCCP Convention dili lamang usa ka panagtapok apan usa ka panaw sa pagbag-o, pagpangandam, ug pagpabilin nga tinuod nga mga Panaw sa Paglaum sa ilang mga parokya. (Preny M. Alinsub, SMPRP LCCP Coordinator)