Mapasalamaton, Matuohon ug Masaligon Bisan sa mga Pagsulay sa Kinabuhi

Unang Domingo sa Kwaresma (March 9, 2025)
Deuteronomy 26: 4-10 / Psalms 91: 1-2, 10-11, 12-13, 14-15 / Romans 10: 8-13 / Luke 4: 1-13

Mga igsoon, ang atong pagbasa niining Unang Dominggo sa kwaresma nagdala kanato sa tulo ka mahinungdanong butang: pagpasalamat, tinuod nga pagtuo, ug pagsalig sa Dios bisan sa pagsulay. Sa atong kinabuhi, daghan kita’g maayong butang nga angay pasalamatan, apan ang pangutana: nagpasalamat ba kita sa Dios sa tanang kahimtang, lakip na sa atong mga kalisdanan? Atong pamalandongan ang tulo ka mga punto:

Una, Pagpasalamat ug Pag-ila sa Dios. Ang mga Israelita nagpasalamat sa Dios pinaagi sa paghalad sa unang bunga sa ilang yuta, usa ka timailhan nga nakaila sila nga ang Dios maoy nagluwas ug nagpanalangin kanila. Sa ato usab nga kinabuhi, ang pagpasalamat dili lang sa dihang hayahay ang tanan kundi bisan sa panahon sa kasakit ug pagsulay. Ang atong dakong pagpangutana: unsaon nato pagpakita sa atong pagpasalamat? Dili lang sa pulong nga “Salamat, Ginoo,” kundi sa pagkinabuhi nga matarung ug puno sa gugma sa isigkatawo.

Ikaduha, Ang Tinuod nga Pagtuo. Si San Pablo nagpasabot nga ang tinuod nga pagtuo makita sa atong kinabuhi. Ang pagtuo nga walay buhat, patay. Kung kita nagtuo nga si Jesus mao ang Ginoo, kinahanglan ipadayag kini sa atong mga buhat—pinaagi sa kalooy, pagkamatarung, ug pagsunod sa kabubut-on sa Dios. Dili igo nga motuo na lamang kita kutob sa atong hunahuna, kundi kinahanglan makita kini sa atong binuhatan. Giunsa nato ipadayag sa atong kinabuhi nga tinuod ta nga nagtuo sa Dios?

Ikatulo, Pagsalig sa Dios Bisan sa Pagsulay. Si Jesus gisulayan sa yawa sa disyerto sa pagkaon, gahum, ug pagsulay sa Dios, apan wala siya matinag. Gipakita Niya nga ang pagsalig sa Dios labaw sa tanang butang. Kita usab masulayan sa kinabuhi, apan mosandig ba kita sa Dios o mas mopili lang ba ta sa mas sayon nga dalan? Ang kasaysayan sa atong kinabuhi puno sa pagsulay, apan ang pangutana: nagpabilin ba kitang masaligon sa Dios?

Sa Katapusan, ang Dios nagtawag kanato nga magkinabuhi nga puno sa pagpasalamat, tinuod nga pagtuo, ug pagsalig Kaniya bisan sa mga pagsulay. Karong semana, buhata kini: magpasalamat sa tanang butang, ipakita sa buhat ang imong pagtuo, ug likayi ang mga butang nga makapahimulag kanimo sa Dios. Pangayoon nato ang grasya nga sama ni Cristo, kita usab makasupak sa tentasyon sa atong kinabuhi. Amen. (Fr. Julius Lugay)