Nganung kinahanglan kita nga maghinulsol?

Ika-3 Domingo sa Kwaresma (March 23, 2025)
Ex 3:1-8a, 13-15 / Ps 103:1-2, 3-4, 6-7, 8, 11 (8a) / 1 Cor 10:1-6, 10-12 / Lk 13:1-9

Ang paghinulsol mao ang usa ka butang nga kinahanglan natong buhaton tungod kay kita makasasala.

Sa dihang maghinulsol kita, ang atong kasingkasing ug konsensya malimpyo gikan sa sala. Ang paghinulsol dili lamang maghatag og kalinaw, apan magpalig-on usab sa atong relasyon sa Dios. Sa katapusan, ang paghinulsol magtudlo kanato sa pagkamapaubsanon pinaagi sa pag-angkon sa atong mga kalapasan, ug magpahinumdom kanato sa klaro nga kamatuoran nga nanginahanglan kita sa kalooy ug grasya sa Dios.

Apan ngano nga daghan kanato ang dili andam mobuhat niini? Usa sa mga posible nga rason mao ang kakulang sa atong kabubut-on sa pagpaubos. Hinungdan sa atong mga pag-antos, nabati nga kahiubos ug kasakit, ug pagdumili sa kaayo sa Dios.

Si Hesus sa atong Ebanghelyo, nag-awhag kanato nga maghinulsol gikan sa tanan natong mga sala. Nagpasabot kini nga andam kita mobiya sa bisan unsang buhat sa sala. Andam usab kita nga dawaton ang pag-alim ug kalooy sa Dios pinaagi sa Sakramento sa Pagpakig-uli.

Ang Dios maloloy-on ug mapailubon, ug nagahatag kanato og kahigayonan aron mausab ang atong kinabuhi. Sama sa mag-uuma nga naghangyo pa og usa ka higayon alang sa kahoy aron mamunga, ang Dios nagahatag usab kanato og daghang kahigayonan sa paghinulsol ug pagpanginabuhi sa matarong aron kita magmabungahon. Hangtod nga aduna pay kahigayonan nga gihatag ang Dios, magapadayon ang paglaum sa atong kinabuhi. Ang iyang gugma ug grasya magapadayon sa pagpangita kanato, ug magahatag og bag-ong kahayag ug paglaum, bisan pa sa atong mga kapakyasan. (Sem. Roldan Baliano)