Paghinulsol, Pagpakig-uli, ug Pagbag-o: Buluhaton panahon sa Kwaresma

Ang Kwaresma mao ang panahon sa Simbahan nga ginasaulog sulod sa kap-atan ka mga adlaw diha sa pag-ampo, pagpuasa ug pagpamalandong sa mga kaagi ni Jesukristo sa Iyang Pagpasakit, Kamatayon ug Pagkabanhaw. Magsugod kini sa Miyerkules sa Badlis/Abo ug matapos diha sa gabii sa Huwebes Santo (Katapusang Panihapon). Kining kap-atan ka mga adlaw naghulagway sa sakripisyo sa atong Ginoo sulod sa kap-atan ka adlaw ug gabii diha sa kauhaw ug kaggutom ngadto sa disyerto. Sulod sa panahon sa Kwaresma kita gi-awhag sa pagbag-o sa atong kaugalingon pinaagi sa paghinulsol sa atong mga sala, pagpasaylo sa atong isigkaingon, pagbasa ug pagpamalandong sa Pulong sa Dios, pagtabang sa mga kabus, ug pagpugong sa kaugalingon pinaagi sa pagpuasa.

Diha sa atong pagpamalandong, kita mapahinumduman usab sa tubig sa bunyag diin kita nabunyagan sa kamatayon ni Kristo, namatay ug nalimpyuhan sa sala ug nakadawat sa bag-ong kinabuhi. Mamahimong makahuluganon ug mabungahon ang pagsaulog sa Kwaresma ug Semana Santa kung kita mangandam sa espiritwal ug pisikal nga panginahanglan niini. Isip mga Pilipinong Katoliko, aduna kitay nindot nga nagkadaiyang mga pamaagi o tradisyon sa pagsaulog ug pag-obserba sa panahon sa Kwaresma nga hangtud karon atong ginabuhat ug gipadayon isip pagpadayag sa atong dakong pagtoo sa atong Dios nga Manluluwas. Diha sa pisikal (external) nga pagpangandam;

Una, mao ang pagsimba sa Miyerkules sa Abo, diin kita pagabadlisan sa agtang, timaan sa atong pagbasol ug pagpaubos sa kaugalingon isip makasasala.

Ikaduha, mao ang pagpuasa ug pagpugong sa kaugalingon sama sa dili pagkaon ug karne niining mga adlawa: Miyerkules sa Badlis, Biyernes Santo ug tanang Biyernes sa Kwaresma. Mahimo usab nga bisan sa mga ginagmay nga pamaagi kita makabuhat sa pagpugong sa mga butang-kalibutanhon sama sa paglimita sa paggamit sa social media, dili pag-usik-usik sa mga gasa sa kinaiyahan ug pagtabang sa pagprotekta niini, ug pagpaambit sa mga grasya nga anaa kanato ngadto sa mga kabus (stewardship). Ang pagpuasa usa ka spiritual exercises nga makapaduol kanato diha sa Ginoo. Ang Simbahan nagmando nga ang tanang nag edad 18 hangtud sa 60 gikinahanglang magbuhat sa pagpuasa gawas lamang niadtong mga nag-antus sa sakit ug dili makahimo niini (CIC 1252).

Ikatulo, mao ang Pabasa sa Pasyon na sagad nang ginabuhat sa atong mga katigulangan.

Ikaupat mao ang pagre-enact o pagbuhat sa Senakulo o Pasyon ni Cristo matag Biyernes Santo.

Ika-lima mao ang pag-Visita Iglesia, diin atong nabatasan ang pagbisita sa mga simbahan ug pag-ampo sa Dalan sa Krus. Mamahimo usab kitang muapil sa uban pang kalihukan sa atong parokya o bisan gani sa atong ginagmay nga nagkadaiyang pamaagi diha sulod sa atong pamilya, trabahoan, o komunidad.

Sa laing bahin, ang spiritwal (internal) nga pagpangandam ug disposisyon maoy labing importanteng pagpangandam sa maong dakong kasaulogan. Ang tiunay ug kinasingkasing nga pagtuman sa mga obserbasyon sa Kwaresma maoy makapaduol kanato sa Dios, diin mas mapalawom ug masabtan nato ang mga misteryo sa atong kaluwasan nga halad ni Cristo alang kanatong tanan. Kinahanglan nga limpyo kita ug nakadawat sa Sakramento sa Kumpisal aron mahimong angayan sa pagdawat sa Eukaristiya nga mao ang hinalad nga Lawas ug Dugo ni Cristo, diin kita mahiusa diha Kaniya. Ang dakong hagit alang kanatong mga Magpapanaw sa Paglaum (Pilgrims of Hope) karon, mao nga unta bisan pa man ug dili panahon sa Kwaresma o Adbyento kita mamahimong makanunayon sa atong mga gimbuhaton—Buhat sa Kalooy; isip timaan sa atong gugma sa Dios ug sa atong kaigsoonan.

Ang Ginoo nagsugo kanato sa paghigugma sa atong mga kaaway, pagpakita ug kalooy ug pagpasaylo sa mga nakasala kanato, ingon nga kita usab pasayloon. Si Jesukristo nga atong Ginoo, ang maayong ehemplo ug sumbanan sa gugmang walay sukod. Diha sa iyang Pasyon, Siya mihalad sa iyang kinabuhi alang kanatong iyang mga Anak nga nahisalaag. Mao nga sama Kaniya, kita usab makalaum nga mabanhaw gikan sa kangitngitan sa sala ug madan-agan sa kahayag sa kaluwasan. Ug diha sa atong pagpaningkamot inubanan sa grasya sa Ginoo, kita maninguha gayud pagtuman sa mga gimbuhaton ning panahon sa Kwaresma diha sa paghinulsol sa atong mga sala, pagpakig-uli Kaniya ug sa atong kaigsoonan, ug sa pagbag-o sa kaugalingon aron mahimo kitang tinood nga sumusunod ni Kristo. Kay Siya miingon, “kinsa kadtong dili mopas-an sa iyang krus ug musunod kanako dili mahimo nga akong tinun-an” (Lk 14:27). (Sem. Jessie Joseph C. Canonigo)