San Isidro Labrador Parish Lumondao: Nagpahigayon sa Unang Batch sa Re-Echo sa Political Values Formation

Kabahin sa pagpangandam sa umaabot nga National Mid-Term Election karong May 12, 2025, ang Archdiocese sa Davao miabli pag usab sa Archdiocesan Citizens Engagement Committee (ACECom) alang sa pagtabang niining mahinungdanong panghitabo sa atong nasud.

Ang tumong sa ACECom mao ang pagdala sa atong mission sa Ebanghelyo diha sa politikanhon nga aspeto sa atong kinabuhi isip usa ka nasud. Usa sa tahas sa ACECom mao ang pagpahigayon ug Political Values Formation sa matag Parokya sa Archdiocese. Ang mga tumong niining maong pormasyon nga makahulagway ang mga partisipante sa mga importanteng mga panghitabo ug sitwasyon sa kasamtangang panahon; makahimo sa pag-ila sa mga hiyas nga angayang batunan sa matag usa alang sa kalambuan sa atong komunidad, mga hjyas nga atong puy-an nga mamahimong mapanalaminan sa uban ug usab ang pagtahan sa kaugalingon nga makatabang sa pagpanday sa usa ka mas mayo nga katilingban.

Ang Parokya sa San Isidro Labrador sa Lumondao, adunay tulo ka pinadala gikan sa nagkalain laing ministriya sa parokya nga misanong sa tawag nga mahimong Trainor sa Political Values Formation Seminar mitambong sa Trainor’s Training Seminar niadtong February 2, 2025 sa Immaculate Conception Parish Mintal – Flory Ann Villarino (SILP Fomator, Catechist); Gabriel Laguros (SILP SocCom); Echerica Yamba (SILP Formator, SocCom Coordinator). Adunay 52 ka GKK ang San Isidro Labrador sa Lumondao, nauyonan sa Parish Pastoral Council uban sa approval sa among Padre Kura Fr. Dexter Veloso, nga ipahigayon ang Political Values Formation Seminar sa matag Zona sa tumong nga adunay aktibo nga partisipasyon sa mga partisipante panahon sa Re echo, ug kini pagatambungan sa mga pangulo ug katilingban. Ug adunay re echo nga mahitabo gikan sa mga pangulo ngadto sa katilingban. Sa ingon niini nga paagi usab mas mapalawoman ang pagpasabot dinha sa mga topic. Gisugyot sa mga trainors nga pagasugdan gilayon ang Political Values Formation Seminar aron kini makatuhop pa sa huna huna ug galamhan isip mga Kristohanong magboboto. Ang Political Values Formation Seminar sa Parokya pagatapuson sa dili pa ang kasagsagan sa kampanya. Ang Political Values Formation Seminar sa Parokya pagahimoon sa February 23 hangtod sa April 12, ang matag zona ang nagpili sa ilang gusto nga schedule haum sa ilang katilingban.

Gipahigayon ang unang batch sa Political Values Formation Seminar sa Zona 2, February 23, 2025, Sunday sa GKK San Isidro Labarador Pagan Grande, Lumondao. Ang maong zona gilangkuban sa upat ka GKK; adunay 28 ka mga partisipante ang nitambong sa maong Political Values Formation Seminar. Matud pa sa mga partisipante nalipay sila sa gipahigayon ng Values formation kay daghan na nga mga hiyas nag nakalimtan tungod sa kadaghan sa mga panghitabo sa komunidad. Makita ang aktibong partisipasyon sa mga miyembro diha discussion ug workshops. Atol sa Political Values Formation usab gipahinumdoman kita nga kabahin niini ang atong pagtubag isip mga Misyonero nga mga Disipulo nga “DUNGAN SA PAGPANAW”( SYNODALITY” ug PAGKA- MAAYONG PINIYALAN “ STEWARDSHIP”. Alang sa mapadayunong kabag-ohan sa Simbahan ug sa katikingban. Ang PSAM Ministry usab gihatagan ug higayon ipasabot ang pag-awhag ug mga volunteers sa PPCRV. Malampuson nga napahigayon ang unang batch sa Political Values Formation uban sa Trainors sa Political Values Formation Seminar ug sa PSAM.

DALAYGON ANG DIOS!

(By Echerica U. Yamba, SocCom Coordinator SILP Lumondao)