Ang Diosnong Kalooy Makapatigom, Dili Makapatibulaag

Ika-2 nga Domingo sa Pagkabanhaw (April 27, 2025)
Acts 5:12-16 / Ps 118:2-4, 13-15, 22-24 / Rv 1:9-11, 12-13, 17-19 / Jn 20:19-31

Dili ba ang sala maoy nakapatibulaag sa maayong relasyon sa Dios ug sa tawo? Dili ba nanginahanglan kita nga kaloy-an kung kita nahilayo tungod sa sala nga atong nahimo?

Ang kalooy sa Dios makakabig pagbalik sa mga nahisalaag. Sama ni Tomas diha sa Ebanghelyo, ang mga nakapaluya ug nakapahisalaag kanato halayo sa Dios ug sa katilingban, makapabalik nato kung kita makahikap ug makamaong mobati sa kasakit ni Jesus. Makahikap unta kita sa mga samad ni Jesus pinaagi sa atong kasakit nga personal ug katilingbanon aron sama kang Tomas kita matigom pagbalik uban sa Dios ug sa katilingban.

Ang Diosnong kalooy makapaamgo nga walay tawo nga sama sa pulo o isla, nag-inusara. Ang matag tawo angayan nga moambit sa pag-antus nga mapailubon sa isigkatawo. Mas gaan ang palas-anon kung adunay kauban sa pagpanaw. Sama sa giingon sa ikaduhang pagbasa, mabati unta nato ang panginahanglan sa mapaubsanong paglawig ug pakighiusa sa atong kasilinganan. Taliwala sa usahay magkalahi nato nga panglantaw, makighiusa unta kita sa panaw padulong sa espirituhanong kaluwasan pinaagi sa pakiglambigit alang sa pagpangitag solusyon sa mga hagit nga giatubang karon.

Ang Diosnong kalooy makaagni sa mas daghang sumusunod. Kining pagsunod ug pagtigom dili lamang tungod kay nakasinati ug nakakita sa mga milagro ug kaayohan sama sa nadungog nato sa unang pagbasa. Kining pagdaghan sa sumusunod nga dala sa kalooy sa Ginoo magtumong aron sa pagtabang sa mga luya ug nanginahanglan. Kini nagpalig-on sa pag-alagad sa nawad-an sa paglaum, sa pasensiya, sa kasakit ug kabudlay. Ang kadaghan dili alang lamang sa numero kondili alang sa pagdawat sa usa’g usa aron malingkawas gikan sa kalisod nga kahimtang.

Busa, pasalamatan ta ang Ginoo kay siya maayo. Ang iyang gugma hangtod sa kahangturan. Ang iyang kalooy nga walay sukod maghimo unta kanato nga makapatigom ug dili makapatibulaag. Malipayong Domingo sa Diosnong kalooy kanatong tanan!