Ang Nabanhaw Nga Dios Naghagit Sa Pagkamaayong Alagad-pangulo

Ika-3 nga Domingo sa Pagkabanhaw (May 4, 2025)
Acts 5:27-32, 40b-41 / Psalm 30:2, 4, 5-6, 11-12, 13 / Revelation 5:11-14 / John 21:1-19

Sa pagkabanhaw ni Jesus gidasig niya ang iyang mga tunun-an nga manguna isip alagad-pangulo sa katilingbang magtutoo. Kining mosunod ang iyang mga hagit.

Una, ang pagkugi ug paghalad sa kusog, talento ug mga singot aron makakuha. Siya miingon, itaktak ang inyong pukot. Ang matuod nga pagpangulo nagkinahanglan sa pagtahan sa kaugalingon ug dili lamang ang pagdikta ug pagsugo sa uban. Ang matuod nga pag-alagad nagsukad sa paghikalimot sa kaugalingon nga kalipay ug gusto, kondili ang pagbudlay alang sa pagpaambit sa kalipay sa uban.

Ikaduha, ang pagsalo uban sa kagutom sa iyang isigkaingon. Si Jesus midapit sa iyang mga tinun-an sa pagdala ngari og pipila sa mga isda nga inyong nakuha. Siya buot nga moambit sa ilang katagbawan ug mouban sa ilang selebrasyon sa nakuha nga mga isda. Ang matuod nga lider andam makig-uban sa iyang katawhan sa bisan unsang kasinatian, kagutom man o kabusog.

Ikatulo, panig-ingnan o ehemplo. Kini iyang gisulti “sunod kamo kanako”. Ang iyang istilo sa pagpangulo ug pagpangalagad mao ang sumbanan. Giawhag kita sa pagsalamin kanunay sa iyang walay kahakog apan manggihatagon nga pagpangulo ug pag-alagad.

Hinaot nga sa atong pagpangandam sa umaabot nga piniliay, atong mapuy-an ang mga mithi sa pagdesisyon alang mga mapili nga subay sa giya sa nabanhaw nga Dios.