Forum Magsiguro Sa Integridad Sa Eleksyon

Gipangandaman na karon sa Archdiocesan Citizens Engagement Committee (ACE COM) sa Arkidayosis sa Dabaw ang usa ka panagtigom tali sa Commission on Elections (COMELEC) sa syudad aron masiguro ang integridad sa piniliay ug sutaon ang papel sa Automated Counting Machines (ACM) nga maoy pagagamiton alang sa Midterm National ug Local nga piniliay sa Mayo 12, 2025.

Gawas sa mga opisyales sa ACE COM ug sa COMELEC, gilaumang tambongan kini sa pundok sa mga abogado, ug mga IT experts.

Sa milabay nga sinemanang panagtigom sa ACE COM, gipasabot sa duha ka mga IT experts nga gikan sa Ateneo de Davao University ang teknikal nga mga aspeto sa ACM ug ang mga unod niini.

Sa milabay nga bulan sa Marso, personal nga gibisita sa IT team sa ACE COM ang COMELEC.

Gibutyag ni Atty. Aileen Lizada, pangulo sa legal team sa ACE COM, nga gipasalig sa COMELEC nga andam ang ilang IT department sa pagtubag sa potensyal nga sitwasyon kung adunay may mahitabo nga hacking.

Sa iyang kabahin, giaghat ni Atty. Lizada, nga gikinahanglang ma-familiarize usab sa mga volunteers ang external ug internal nga features sa bag-ong mga ACM.

Gidasonan ni Atty. Aileen ang pasalig sa COMELEC nga wala gayuy mahitabong data leak o hacking panahon sa eleksyon.

Iyang gipasabot nga ang bag-ong makina sa piniliay dili makapadala og data kung walay internet connection ug kinahanglan nga i-plug kini ngadto sa electrical outlet aron nga mogana.

Apan aron nga maklaro pag-ayo ang mga kabalaka ug mga pangutana kabahin sa ACM, gi-organiza sa ACE COM ang FORUM ON ELECTION OPERATION WITH ACM sa Abril 29, 2025 gikan sa alas-9 sa buntag hangtod sa alas-12 sa udto sa Davao Convention Center (DAVCON).

Tumong niini mao ang pagseguro sa integridad sa piniliay ug ang papel sa ACM alang sa matinud-anon ug hapsay nga eleksyon.

Hinoon, limitado lamang ang kapasidad sa DAVCON apan mamahimong maminaw sa maong kalihukan pinaagi sa DXGN 89.9 SPIRIT FM o motan-aw pinaagi sa official Facebook page sa DXGN 89.9 SpiritFM-Davao.

Gidasig ang tanan ilabi na ang mga ACE COM Parish Coordinators ug ang mga volunteers nga mosalmot sa maong forum pinaagi sa pagpadala sa ilang mga pangutana sa DXGN Textline: 09497887395 o di ba kaha sa pag-post sa ilang mga pangutana sa comment section sa atong official Facebook page.