Kuyog Sa Panon Paingon Sa Langit

(An excerpt of the homily of the Most Reverend Romulo G. Valles D.D. During The Encuentro/ Easter Sunday Of The Lord’s Resurrection Mass At San Pedro Cathedral Last April 20, 2025.)

Mga igsuon sukad kagabii very solemn Mass, atong gisaulog ang kadaugan, ang pagkabanhaw sa atong Manunubos. Viva Jesus! Viva! Ug kining Misa karon mao ang ikaduhang Misa, ang unang Misa ang pinakadakong Misa gabii. Niya kini karon murag overflow na, unsay kahulugan niini?

Ang Mahal nga Birhen nagrepresent kanato, nagrepresent sa kalipay sa pagkabanhaw. Kung makaremember kamo, kung naminaw mo ang pinakasentro sa Sugat mao katong pagkanaog sa anghel. Pinoy kaayo ni, Pilipinas ra gyud, kita ra gyud naghimo niini ang ubang mga matuohon ma-amaze sila sa creativity ug deep devotion sa katawhan nga Pilipinhon. Mikanaog ang anghel, nindot ang awit, apan ang akto sa Sugat nga importante, unsay nahitabo, pagkanaog, unsay gibuhat sa anghel mikanta lang? Dili oy, unsay gibuhat sa anghel? Iyang gikuha ang belo nga itom. Humana ang kasakit, humana ang pagbangutan, maglipay kita kay sa makausa pa karong tuiga atong gihandom ang kadaugan sa Ginoo.

Ang kadaugan batok sa kamatayon, ang kadaugan batok sa sala, ang kadaugan batok sa pagsupak sa Ginoo. Kay ang sala magdala nato sa kamatayon. Matod pa sa usa ka pamalandong, dili ang Ginoo ang mobutang nato sa impyerno kay ang Ginoo gugma. Kinsay magbutang nato sa impyerno, kita ra ang atong sala magdala nato sa kamatayon. Busa nabanhaw si Hesus, Aleluya, Aleluya kay kamatayon iyang gipildi. Kung mouban kita kang Hesus, kita usab makabaton sa pagkabanhaw ug kana mao ang tuburan sa tumang kalipay.

Karong ikaduhang Misa sa pagkabanhaw, kay gabii mao ang pinakadakong Misa, I would like to tell you na maayo gayud kung nisimba kita sa Misa sa pagkabanhaw gabii gipakita ang kalipay sa Simbahan. Unsa kanang maong kalipay? Mga igsuon hangyuon ko kamo sa pag-imagine kining Maria, Mahal nga Birhen nagbelo siyag itom, unsay rason nagbelo siyag itom, naguol siya, namatay ang Iyang Anak pero dungagi pa, nganong guol kaayo siya. Ayaw kalimot, diha sa Biyernes Santo, diin ang Mahal nga Birhen sa tiilan sa Krus. Kanang guol dili lang guol perting guola kay didto siya sa tiilan sa Krus, nagbitay ang iyang Anak, didto siya sa nabugtuan og ginhawa ang iyang Anak. Busa ang belo nga itom kulang pa sa simbolo sa naguba, nagisi nga kasing-kasing sa Mahal nga Inahan.

Mga igsuon, kita nga nagasulay sa daghan nga kasakitan sa kinabuhi, labi na ang kamatayon makaingon tinuod ang itom nga belo sa Mahal nga Birhen. Sa makausab pa karong adlawa sa second mass, ang Mahal nga Birhen mao ang modelo, no matter what dili ta mawad-an sa paglaum ug pagtuo nga moabot ang panahon nga ang anghel sa Ginoo mokuha sa belon ga itom nato. Mary is our model nga kon kita magmalig-on sa pagtuo, matagamtam nato ang kadaugan sa pagkabanhaw sa iyang Anak. Viva Hesus! Aleluya! Aleluya!