Pagbarug sa Konsensya alang sa Mahinungdanong Pagboto

Mga Tarpaulin. Pamphlets. Mga Rally sa Kampanya. Mga Jingle.

Kini ang mga ilhanan sa padulongay nga nasyonal ug lokal nga eleksyon kung ana ang uban nangandoy mamuno ug moserbisyo sa atong nasud.

Mao usab nga mga butang ang gigama nila aron ipanghatag sa mga botanteng anaa sa lain-laing sektor sa katilingban.

Usa na niini ang mga magtutudlo nga adunay duha ka mahinungdanong papel sa umaabot nga eleksyon, mao ang pagboto ug pagserbisyo sa komunidad isip mga supporting staff sa Commission on Elections o COMELEC.

Kini nasinati ni Ma’am Nancy Santillana, usa ka magtutudlo sulod sa traynta’y kwatro (34) ka tuig sa Island Garden City of Samal, nga naghatag ug dakong pagtagad sa pagboto isip kaugmaon sa bag-ong henerasyon diin ang tanan nagsalig niini.

Isip usa ka magtutudlo, importante gayud kang Ma’am Santillana ang pagboto tungod nagapakita kini sa ilang katungod sa pagpili diin ilang pilion ang maayo nga kandidato para sa angay nga posisyon, labi nga kadtong adunay maayong baruganan ug prinsipyo.

Aduna siya’y dakong paglaum nga magpabilin gehapong malinawon ang Isla sa Samal sa umaabot nga piniliay, ug pilion sa tanang mga botante ang mga insaktong kandidato para sa nasyonal ug lokal.

“Hinaot nga ang mga Samaleño mopili sa labing maayong mga konsehal kay anaa kanila ang dakong papel,” dugang pa niya.

Gidani ni Ma’am Santillana ang tanan nga moboto subay sa ilang konsensya, dili tungod sa mga gihatag sa mga kandidato, ilabi nga nagapadayon gihapon ang vote buying nga dugang pa niya nagapaubos sa mahinungdanon sa usa ka tawo.

“Adunay mga angay nga kandidato para sa pagka-mayor ug hangtod sa mga konsehal. Daghan sa mga opisyal ang angay anang mga posisyon. Hinaot nga motubo pa ang atong ekonomiya ug ang mga baruganan sa mga Samaleño,” matod pa ni Ma’am Santillan.

Si Ma’am Santillana usa lamang sa milyon-milyong mga botante sa nasud nga nagpamatuod nga matinud-anon ug maalamon sa pagpili sa takus nga kandidato nga iya ginahandom.

Kini nagpasabot nga ang pag-shade sa atong balota sa umaabot nga piniliay adunay dakong papel sa kaugmaon sa atong lokal ug nasudnong panggamhanan.

Makab-ot nato ang maayong kaugmaon nga atong gipangandoy kung atong pilion ang kandidato nga angayan mubarog ug muprotekatr sa katawhan. (Ayah Deniega | HCDC Intern)