Pagpuyo sa Bag-ong Kahayag!

Doming sa Pagkabanhaw (April 20, 2025)
Acts 10:34, 37-43 / Ps 118:1-2, 16-17, 22-23 / Col 3:1-4 or 1 Cor 5:6-8 / Jn 20:1-9 or Lk 24:13-35

Kining adlaw sa pagkabanhaw tataw nga gisangyaw ni San Pedro diha sa unang pagbasa. Gisaysay usab kini ni San Pablo nga maoy hinungdan sa bag-ong patubo nga nagwagtang sa kahuyang ug nagdala sa kamatuoran. Mao nga nagaampo kita nga unta mabanhaw usab sa bag-ong kahayag sa kinabuhi tungod sa pagkabanhaw ni Kristo.

Una sa tanan, kita gitawag sa pagpuyo sa maong kahayag pinaagi sa pagsaksi sa pagka-Dios ni Kristo. Taliwala sa pagdinautay ug pagpaunhanay, kita giawhag nga mamahimong saksi sa unsay kaayo nga pwedeng mahimo sa matag usa. Kita unta mahimong saksi sa kalumo ug pagka-kalma taliwala sa mga kaguliyang nga dala sa pagkumpetensiya ug pagpaunhanay sa matag usa. Dili unta kita mahimong instrumento sa pagpataas sa kaugalingon, kondili sa pagpaubos ug pag-alagad nga tiunay.

Ikaduha, ang pagpuyo sa kahayag mapakita unta nato diha sa pagkahimong patubo sa kahiusahan sa katawhan. Inay kita makapainit, makapa-ut-ot ug makapatibulaag, mapatubo unta nato ang pagsinabtanay ug kahapsay, ug dili ang pag-insulto sa usa’g usa ug pagkawalay respeto. Sama sa nating karnero, magmapaubsanon unta kita nga molantaw sa dignidad sa isigkatawo ug dili sa pagpahimulos sa mga ubos ug timawa natong isigkatawo.

Ikatulo, giawhag kita nga mobati sa matag usa. Sama nga si Maria Magdalena midangop kang San Pedro ug sa mga tinun-an, ug sama nga ang unang miabot sa lubnganan mihulat kang San Pedro sa wala pa siya mosulod, kita usab unta mobati ug mopanaw kauban ang isigkaingon. Wala unta mamintaha ug mopahimulos kanato aron lamang makab-ot ang iyang hinakog nga tumong, kondili mobati unta ug mohatag og respeto sa kahimtang sa paningkamot sa matag usa, labina gayod sa mga huyang ug hinay niining panaw nga espirituhanon.

Giila kining adlawa nga piyesta sa tanang piyesta. Ang kandila paskal nga gisindihan ug ania sa atong atubangan nagpadayag sa hagit sa pagpuyo sa kahayag sa pagkabanhaw ug sa dili pagpabilin sa kangitngit sa sala. Malipayong Pasko sa Pagkabanhaw kanatong tanan!