Pasensya

Domingo sa Pasyon (April 13, 2025)
Is 50:4-7 / Ps 22:8-9, 17-18, 19-20, 23-24 / Phil 2:6-11 / Lk 22:14-23:56 or Lk 23:1-49

Nakasinati ka na ba nga nag- inusara ug gisalikway? Nasulayan mo na ba nga gibiyaan ug gitalikdan human ka nagbuhat sa maayo?

Niining tuig sa hubileyo, tuig sa paglaum, gisaysay ni Sto. Papa Francisco nga ang pasensya maoy birtud nga nagpadayag sa paglaum. Atong nadungog sa Ebanghelyo nga ang pasensya ni Jesus naghatod kaniya sa pagtugyan sa iyang kaugalingon ngadto sa Amahan. Samtang siya nagbitay sa krus, siya nakapasaylo. Samtang siya gitaral, siya nagpaubos nga miatubang kanila. Kita kaha, unsay atong kinaiya kung mahiagum usab sa mga sakit nga pulong ug buhat batok kanato?

Sa unang pagbasa, atong nadungog ang pagpaubos sa pinili sa Dios pinaagi sa pagpugong sa mga pulong. Ang pagpugong bisan sa dili pagsukol ug pagbatok bunga sa matuod nga pagpamalandong. Kita kaha makapugong ba sa atong baba sa kasuko ug sakit nga pulong? Makapugong ba kita sa komentaryo nga makapainit sa uban o makapatibulaag inay makapahiusa ug maghatod sa kalinaw?

Sa ikaduhang pagbasa, si Kristo nagpaubos ug nahimong Sama sa suloguon. Siya wala maghuna-huna nga labaw kang bisan kinsa. Kita kaha, andam ba usab nga dili mobatig kahawod kaysa uban? Makapalabay ba kita sa atong garbo bisan dili kita mahimong inila o bida?

Ang atong salmo responsoryo dili kini reklamo ug pagpaningil sa Ginoo human kita nakabuhat og maayo. Hinunoa, kini ka pagpadayag sa pagpasensya nga dala sa paglaum sa panabang ug kadaugan sa Dios. Mao nga Kung gibati man nato nga kita gibiyaan, atong pag-ampo nga sama kang Jesus nga sumbanan sa mapaubsanong pag-antus, kita unta makat-on sa pagpasensya diha sa pag-antos aron makaambit kita sa iyang pagkabanhaw. Ang pasensya nagtubo sa tawong malaumon.