“Si Hesus ang tinuod nga bida” – Abp. Valles sa Pastoral Visit sa San Miguel Parish, Panacan

Niadtong ika-24 sa Marso, dakong kalipay ang gibati sa mga parokyano sa San Miguel Parish, Panacan atol sa tulo ka adlaw nga Pastoral Visit ni Most Rev. Romulo G. Valles, D.D.

Sa pagsugod sa iyang bisita pastoral, usa ka mainiton ug mahigugmaong pagdawat ang gihatag sa San Miguel Parish alang kang Abp. Valles. Sa iyang pag-abot, gipahigayon ang mga photo-op, nga gisundan sa paghalok sa krus ug pagsaulog sa Santos nga Misa. Sa maong pagbisita, iyang gihatagan ug gibug-aton nga ang tinuod nga bida sa maong panagtapok mao ang Ginoo mismo. “Dili ako ang bida sa kini nga Pastoral Visit, kundili si Hesus mismo,” matod niya.

Pagkahuman sa Misa, nagpadayon ang programa sa usa ka Kolokabildo: Dialogue with Abp. Muloy. Usa kini ka mahinungdanong pakigdiyalogo diin gituki ang daghang isyu sa parokya, ug adunay mabulokon nga mga presentasyon gikan sa GSLs ug ubang mga organisasyon sa simbahan. Gitapos kini sa Final Blessing diin ang Arsobispo mismo mipanalangin sa mga rosaryohan nga iyang gihatag sa mga parokyano isip handumanan.

Sa ikaduhang adlaw sa iyang pagbisita, Marso 25, ang Arsobispo mipaingon sa usa sa mga GKK sa parokya, ang Immaculada Concepcion Chapel (ICC) – Km. 12 (Zone 2). Atol sa iyang pag-abot, usa ka photo-op ang nahitabo kauban ang mga sakop sa Zone 2. Pagkahuman, usa na usab ka Santos nga Misa ang gipangulohan ni Abp. Valles, uban ang konselebrasyon ni Rev. Fr. Mervin George Maglana, Kura Paroko sa San Miguel Parish.

Sa iyang homiliya, gibutyag ni Abp. Valles ang kamahinungdanon sa pagsaulog sa liturhiya nga may kasingkasing. “Ang Misa dili lang usa ka obligasyon, kini mao ang atong kinabuhi, ang atong pagpakig-uban sa Ginoo,” iyang gipahinumdom.

Sa gabii, usa ka makahuluganon nga Pakighinabi with Abp. Valles ang nahitabo. Gipasiugda kini sa usa ka Opening Salvo ug Intermission Numbers nga gipangandam sa mga kabatan-onan sa Zone 2. Si Mr. Joel Reyes, PSL, mipadayag sa kasaysayan sa ilang GKK, samtang si Brgy. Capt. Jerry Licarte mipasiugda sa iyang Storya sa Pagtoo, diin iyang gipaambit ang iyang mga kasinatian ug kinabuhi subay sa iyang pagtoo sa Ginoo. Gitapos kini sa Final Blessing, ug sama sa unang adlaw, iyang gihatagan og mga rosaryohan ang mga miyembro sa komunidad.

Sa ikatulo ug katapusang adlaw, Marso 26, nahitabo ang pakigdiyalogo ni Abp. Valles sa Parish Staff. Matod pa ni Abp. Valles, sila ang “mga gapalihok sa parokya,” ug busa ang ilang papel hinungdanon gayud. Sa samang higayon, iyang gipirmahan ang mga Canonical Books, usa ka dakong panghitabo sa kasaysayan sa parokya.

Aron tapuson ang iyang Pastoral Visit, usa ka Santos nga Misa ang gipahigayon, gipangulohan ni Archbishop Valles uban si Fr. Maglana. Sa maong selebrasyon, iyang gipahinumdoman ang mga katawhan sa pagtinabangay sa komunidad sa simbahan. “Ang simbahan usa ka pamilya. Kung magkahiusa kita sa pag-ampo ug pag-alagad, mas lig-on kita isip usa ka lawas ni Kristo,” iyang gipaambit. “Kita dapat mutuhop una sa atong mga GKK… kay ulaw gayud nga active ta dinhi [parokya] apan wala kita mituhop sa atong mga kaugalingong GKKs,” dungag ni Abp. Valles nga nagtumong sa mga aktibong layko nga deboto ug sakop sa nagkadaiyang organisasyon.

Apan ang tinuod nga diwa sa Pastoral Visit dili mahuman dinhi. Kini usa ka pahinumdom nga ang atong pag-alagad ug pagtoo dili lamang sa sulod sa simbahan kundili sa matag adlaw nga kinabuhi. Sama sa gibilin nga mensahe ni Abp. Valles, ang matag usa gitawag sa pagpakabana, pagtinabangay, ug pagpuyo isip tinuod nga katawhan sa Dios. (Ma. Joneila Laruya)