Ipaambit ang paglaum nga anaa sa inyong kasing-kasing uban sa kalumo

Solemnidad sa Pagsaka sa Ginoo (June 1, 2025)
Acts 1:1-11 / Ps 47:2-3, 6-7, 8-7 / Eph 1:17-23 or Heb 9:24-28; 10:19-23 / Lk 24:46-53

Ang paghandum sa Pagsaka sa Langit sa atong Ginoo niining tuig 2025 mao usab ang ika-59 nga kasaulogan sa Kalibotanong Adlaw sa Sosyal nga Komunikasyon. Ang tema mao: “Ipaambit ang paglaum nga anaa sa inyong kasing-kasing uban sa kalumo”.

Sa Ebanghelyo, ang Ginoo maoy unang mipaambit niining paglaum. Kini nga paglaum mao ang saad sa iyang panalangin, ang panalangin sa iyang pakig-uban. Bisan Siya misaka na sa langit, Siya padayon nga nakig-ambit sa atong mga kasakit ug kalipay, sa atong kapakyasan ug kalampusan, sa tanan natong paningkamot. Ang atong komunikasyon dili unta puno sa kasuko ug pagpanalipod sa kaugalingon lamang, kondili abli ug andam sa pakighigala. Ang atong komunikasyon nga gikan sa kasing-kasing mag-abli unta alang sa pagkakita sa kaanyag ug dungog sa matag tawo ug diha sa pag-atiman sa tanan sa atong palibot.

Sa unang pagbasa, sa samang okasyon sa Pagsaka sa Langit sa atong Ginoo nga nabanhaw, ang mga tinun-an nakahupot sa paglaum sa gasa sa Espiritu Santo. Kini ang gasa nga magdala sa kabag-ohan hangtod sa tanang suok sa kalibutan. Ang maong gasa maghimo unta kanato nga iyang mga saksi sa tibuok kalibotan. Ang atong komunikasyon sa matag adlaw o diha sa radyo, cellphone, social media, makapahimo unta kanatong makiglambigit gikan sa kasing-kasing. Magtudlo unta kanato sa pag-alim sa mga samad. Magpalapnag unta sa paglaum taliwala sa kalisod pagpaubos. Magtukmod unta kanato sa pag-atiman ug pagrespeto sa matag usa.

Sa ikaduhang pagbasa, nahilakip kita sa pag-ampo ni San Pablo alang sa mga taga- Efeso nga nag-ingon, “nga malamdagan unta ang inyong salabotan aron masayod kamo unsa ang paglaum nga alang niini gitawag kamo ug aron masayran ninyo ang kadagaya sa mga panalangin nga gisaad niya sa iyang balaang katawhan”. Ang paglamdag sa salabotan maoy atong paglaum aron maangkon nato ang kadagaya isip balaan niyang katawhan. Ang atong komunikasyon mag-abli unta sa atong salabutan nga dili kita managkaaway sa usa’g usa. Magpaamgo unta kanato nga diha sa pagpaminaway maangkon ang matuod nga kadagaya ug kamaya. Magpukaw unta kanato nga wala kitay padulngan kung kita anaa kanunay sa pagkompetensiya ug dili sa panagtambayaong ug paghiusa.

Kung ang Dios nga nabanhaw misaka sa Langit, kini tungod kay atoa na usab nga tahas ang iyang tahas sa pagdalag paglaum. Atoa nga misyon ang iyang misyon sa pagpakaylap sa paglaum. Busa, “ipaambit ang paglaum nga anaa sa inyong kasing-kasing uban sa kalumo”.