Lahutay sa Pagsangyaw kay Kanimo Walay Makaagaw

Ika-4 nga Domingo sa Pagkabanhaw (May 11, 2025)
Acts 13:14, 43-52 / Ps 100:1-2, 3, 5 / Rv 7:9, 14b-17 / Jn 10:27-30

Si Jesus, ang Maayong Magbalantay, nagpahimangno kanato nga siya anaa kanunay. Siya mogiya sa atong pagpili sa mga magbalantay sa atong lungsod ug nasod karong adlawa sa piniliay. Bisan sa pagsupak sa kaayohan, Siya naghatag kanatog kinabuhi aron makaabot molahutay kita alang sa pagpakig-uban sa Dios.

Sa unang pagbasa, anaa gayod ang kasina pagsupak batok sa mga magsasangyaw sa kaayohan. Mao gani nga si San Pablo ug Barnabas wala mohunong sa pagbarog nga kinahanglan isangyaw nila ang pulong sa Ginoo. Busa dili gayod usab nato ikatingala nga sa atong pagpaningkamot sa piniliay nga malinawon, hapsay ug tinuoray, aduna gayoy mga tawo nga hugaw, masupakon sa kaayohan ug mangitag kagubot. Apan dili kita maluya sa padayon nga paningkamot sa pagtudlo, paghimo ug paghatag ehemplo sa kabililhon sa pagsalmot sa piniliay.

Sa Ebanghelyo atong nadungog nga si Jesus naghatag sa iyang panon sa kinabuhing dayon ug dili na gayod sila mangamatay ug walay makaagaw kanila gikan kaniya. Si Jesus manalipod kanato alang sa katarung ug kaayohan sa katilingban. Busa mosalig kita nga bisan dunay mga babag ug pagsulay, dili gayod kita pasagdan sa presensiya sa Ginoo. Adunay paglaum kanunay nga mahan-ay ra ang tanan. Ang Ginoo nasayod unsaon niya kita pagpaamgo ug unsaon kita niya pagluwas sa mga kadaot.

Mao nga sa ikaduhang pagbasa atong nakita ang mga milahutay sa panahon sa pagsulay nga naglingkod uban sa Dios sa iyang trono. Tumong sa Dios nga ang tanan nga nagpabilin nga matinud-anon iyang gantihan sa kahiusahan unya uban sa tanang katawhan. Busa, mahilakip unta kita kanila nga bisan ibuhos nato ang atong kusog, panahon ug bahandi daw sa dugo nga giula ni Jesus, kita magmadaugon alang sa kahiusahan ug dili sa kabungkagan sa iyang katawhan. Andam unta kita nga magpabilin taliwala sa mga kapait nga dala sa lain-laing desisyon.

Busa iampo nato nga ang matag pinili nga tawhanong lider makaagmo nga sila nagkinahanglan kang Jesus isip ilang sumbanan. Unsaon man nimo pagtabang sa atong mga umaabot nga lideres nga makasunod kang Jesus isip ilang sumbanan? Unsa bay imong mahimo aron malikayan nga walay maagaw gikan sa panon sa Amahan? Unsaon man nimo pagputli sa imong kasing-kasing alang sa mabinantayong pagbansay sa imong konsensiya?