Seminar-Workshop Sa Flores De Mayo Nagmalampuson!

Usa ka malampuson nga Seminar-Workshop ang gipahigayon sa St. Francis of Assisi Parish, La Verna niadtong Abril 12 ug 13 ning tuiga agi og pagpangandam sa umaabot nga Flores De Mayo uban sa tema: “Mga Kabataan, Nanag-uban sa Panaw nga Malaumon ug Malipayon Uban ni Maria Padulong Kang Jesus.” Kini nga kalihukan gipasiugdahan ug gipangulohan ni Madelyn Tito, ang Parish Head Catechist ug gisuportahan usab sa makugihon nga Kura Paruko nga Si Fr. Pete Lamata.

Mikabat sa 68 ka mga partisipante ang miapil sa maong Seminar-Workshop nga gilangkuban sa mga Katekista, mga PSK ug uban pang mga GSL ug mga batan-on nga mitahan sa ilang kaugalingon aron motabang sa mga katekista sa ilang pagtudlo sa mga kabataan panahon sa Flores de Mayo.

GitudlOan usab ang mga partisipante sa mga pamaagi sama sa Biblical Dances ug gi-integrate ang Bibliodrama elements nga nakadugang sa kadasig sa mga partisipante sa pagkat-on ug pagpalawom sa ilang relasyon ngadto kang Jesus pinaagi ni Birhen Maria. Nahimong mabulukon, ug mabuhangahon ang gipahigayon nga Seminar-Workshop ug gituohan kini nga dako kaayo og ikatabang alang sa mga kabataan nga motambong sa Flores de Mayo nga anaa ang kalipay ug malingaw sila sa mga activity matag adlaw.

Matud pa sa usa ka partisipante nga si Merilyn Villahermosa nga gikan sa GKK St. Anthony de Padua: “Dako kaayo ang akong pasalamat ug wala ko nagmahay nga mipartispar ko sa maong Seminar-Workshop kay nindot kaayo ang approach nga gigamit, ang proceso makadulot gayod sa kasingkasing.” (Ma. Lea Bernaldez)