Aduna bay pulos ang Misa?

Solemnidad sa Balaang Lawas ug Dugo ni Kristo – Corpus Christi (June 22, 2025)
Gn 14:18-20 / Ps 110:1, 2, 3, 4 / 1 Cor 11:23-26 / Lk 9:11-17

Karong Dominggoha, gisaulog nato ang Solemnidad sa Balaang Lawas ug Dugo ni Kristo, kon Corpus Christi. Kini pagpahinumdom sa matuod nga presensiya sa Dios diha sa Santos nga Misa. Unsa bay pulos sa Misa?

Adunay usa ka Obispo miingon nga walay pulos ang Misa kon “The Mass is useless.” Kini tungod kay diha pa lang sa Ebanghelyo, dili atoa diay nga lihok nga mabusog kita, kondili lihok kini sa Ginoo. Dili diay nato magamit ang Misa aron kita mabusog. Ang Misa mao na gayod ang lintunganay, ang tinubdan ug kinatumyan nga tuyo nato sa kinabuhi, dili kini pamaagi nga gamiton, kay sa Misa atong mahimamat ang tiunay nga presensiya sa Dios nga nagpakaon kanato. Siya ang anaa diha sa Misa mao ang atong tumong ug tuyo, ang pakig-uban, komunyon, kalawat niya. Aduna pa ba kitay laing tumong nga kab-uton gawas sa Iyang Balaang Presensiya diha sa Misa?

Sa unang pagbasa, walay pulos ang atong paningkamot tungod kay dili kita angayan ug takos. Ang tanan gasa gikan sa Dios bisan gani ang pagkaon nga gipanalanginan ni Melchizedec isip pari. Busa gidayeg lamang niya ang Dios nga maoy mihatag sa panginahanglan ug milihok aron manalipod sa Iyang katawhan. Ang maayo nga kahimtang sa Iyang katawhan dili tungod sa paningkamot sa tawo, kondili sa grasya ug panalangin sa Dios. Mao gani nga gitawag ang misa nga Eyukaristiya tungod kay kini pagpasalamat sa lihok sa Dios alang sa atong kaayohan. Giisip ba nato nga ang atong maayo nga kahimtang tungod sa atong pagkugi o kawahod ug dil tungod una sa tanan sa grasya ug panabang sa Dios?

Sa ikaduhang pagbasa, mapaubsanon nga gidawat ni San Pablo nga ang iyang gipaambit dili gikan kaniya, kondili gikan sa Dios. Ang tanan nga iyang gipaambit adunay tuburan sa Dios nga naghatag niini. Siya igo lamang nahimong instrumento sa kaayo ug gugma sa Dios nga kanunay nag-atiman ug nagpakaon sa Iyang katawhan. Ang pagkamatay ug pagkabanhaw ni Jesus nga Manunubos nga maoy tinubdan sa tanang grasya sa kaluwasan dili buhat ni bisan kinsa nga tawo, kondili sa Dios. Sama kang San Pablo, nasabtan ba nato nga ang tanan atong nadawat gikan sa naghingapin nga pagkamanggihatagon ug pagkamaatimanon nga grasya sa Dios ug dili sa atong paningkamot lamang?

Busa, ang Misa dili gamit aron mapuslan, kondili mao gayod ang atong kinatumyan nga tumong ug pagkinabuhi isip mga magtotoo sa Dios. Ang Iyang presensiya nga atong gisaulog ug gisinati diha sa Eyukaristiya mao ang kinabuhi sa tanang magtotoo. Busa maayo gayod nga mosimba kita sa Misa karon nga buhi pa kita kaysa pamisahan lamang kita kon kita patay na.