Faithful and Joyful: Parokya sa OMPH Nagmalampuson ang Fiesta Celebration 2025!

“Journeying with Mary in the Year of Hope” — mao kini ang tema nga nag-uban sa katawhan sa Parokya sa Our Mother of Perpetual Help, Bajada sa ilang mainiton ug madasigon nga pagsaulog sa ika-35 nga kapistahan sa Inahan sa Kanunay’ng Panabang kaniadtong Hunyo 22, 2025, taliwala sa kusog nga ulan.

Ang maong selebrasyon, nga gi-organisa sa mga taga-parokya ug parokyano, nagsugod sa Nobenaryo gikan Hunyo 13 hangtod 21, diin ang matag zona, ministries, ug church council mipasiugda sa matag adlaw nga misa. Usa sa mga highlight mao ang makahuluganon nga prusisyon sa mga modelo sa Santos ni OMPH sa kaagahon sa Hunyo 21, nga gisundan sa Renewal sa mga GSL’s sa alas 6:00 sa buntag nga misa.

Gisentro ang kalihokan sa Pontifical Mass niadtong Hunyo 22 alas 10:00 sa buntag, nga dili lang pagpadungog sa mahal nga Patroness nga si Our Mother of Perpetual Help, apan gisabay usab sa pagselebrar sa Solemnity of Corpus Christi. Ang misa gipangulohan ni Most Rev. Romulo Valles, D.D., ug gikonselebrar sa mga pari sa Congregation of the Most Holy Redeemer (Redemptorist Fathers).

Kini nga misa gi-live cover pinaagi sa social media sa parokya ug sa DXGN 89.9 Spirit FM, nga nakapaambit sa espiritwal nga kalipay ngadto sa mga parokyano nga wala nakatambong sa personal.

Pagkahapon, gipahigayon ang Fiesta Program nga puno sa kalipay ug pakighiusa. Gisugdan kini ug parlor games, dayon sa presentasyon gikan sa duha ka sona, nga gihatagan og higayon nga makapakita sa ilang talento. Human niini, ang katawhan nagkahiusa sa pagpangaon og panihapon nga naglakip sa usa ka tray nga lechon baboy kada sona ang gipanghatag gikan sa parokya, ug libre nga tuna slices gikan sa PPC President nga si Edwin Pilapil, ug uban pang pagkaon nga gidalit sa mga GKK leaders ug mga miyembro.

Human sa panihapon, nagpadayon ang uban pang presentasyon gikan sa mga zona ug LOMAS. Pagkahuman sa mga pasundayag, misunod ang sayawan inubanan sa atong mga pinalanggang kaparian nga sila ni Rev. Fr. Gary Alvarado CSsR, ang kura paroko; Rev. Fr. Leo Armada, CSsR, ang bag-ong Rector sa OMPH Davao; Rev. Fr. Sonny Umbac CSsR ug si Rev. Fr. Lemuel Nadorra.

Dugang pa sa mga espiritwal nga kalihokan, gipahigayon usab ang Renewal sa mga Lectors atol sa 6:00 a.m. Mass niadtong Hunyo 15.

Ang tibuok selebrasyon usa ka pagpamatuod sa lig-on nga pagtuo ug panaghiusa sa mga alagad sa simbahan. Bisan pa man sa ulan, bibo ug puno sa kadasig ang pista, nga gisalmotan sa daghang katawhan.

Ang parokya mapasalamaton sa tanang naningkamot ug nitabang sa kalampusan sa pista — ang mga organizers sa programa, parish staff, GSLs, GKK, ministries, church councils, ug PPC, nga nagtinabangay isip usa ka komunidad.

Viva Inahan sa Kanunay’ng Panabang! Viva Maria!

(By Mary Grace P. Gonzales)