Ika-127 Nasudnong Adlaw sa Kagawasan

June 12, 2025, naghiusa ang mga sakop sa 4th Degree Knights of Columbus Unified Assembly — ang San Miguel Assembly ACN 3834, St. Pio Assembly ACN 4018, ug Golden Valley Assembly ACN 3903 — uban sa ilang mga igsoong worthy Sir Knights sa San Miguel Parish, Panacan, aron sa pagtimaan sa ika-127 nga Anibersaryo sa Kagawasan sa nasud Pilipinas. Kini nga mahinungdanong selebrasyon naghatag og dakong paghinumdom sa atong kasaysayan ug sa mga sakripisyong gihalad alang sa kagawasan sa atong nasud.

Nagsugod ang maong kalihokan pinaagi sa usa ka balaan ug madasigon nga Santos nga Misa, gipangulohan ni Rev. Fr. Rolando O. Mandreza, ang Kura Paruko. Sa iyang homiliya, gipasiugda niya ang pagka-mapasalamaton sa kagawasan nga atong ginatagamtam karon ug ang dakong papel sa pagpakabuhi sa mga prinsipyo sa patriotismo, katarungan, ug panaghiusa. Naghimangno usab siya sa mga parokyano nga kinahanglan magmahimong katawhan nga nasudnon aron mahimong katawhan nga langitnon.

Human sa Misa, nagsugod ang seremonyal nga programa sa atubangan sa parokya, diin ang mga Knights nagsul-ob sa ilang pormal nga regalia — usa ka simbolo sa ilang debosyon sa simbahan ug sa nasud. Ang ilang presensya usa ka timaan sa panaghiusa ug determinasyon sa pagpalambo sa nasodnon nga espiritu ug kaisug.

Gikanta ang Pambansang Awit sa Pilipinas ug uban pang mga makapabati og garbo nga kalantahon nga makapukaw sa nasudnong pagbati sa tanang mitambong. Usa kini ka mabulukon nga higayon sa pagpasidungog sa atong mga bayani ug sa tanang nagsakripisyo alang sa kagawasan.

Ang pagtimaan sa ika-127 nga Anibersaryo sa Kagawasan dili lamang usa ka paghinumdom sa nangagi apan usa usab ka panawagan sa tanang Pilipino nga ipadayon ang pagkugi ug pagmahal sa nasud. Ang Knights of Columbus nagpakita sa tinuod nga espiritu sa serbisyo ug pagkamakabayan.

Sa pagtapos sa selebrasyon, nagpasalig ang tanan nga padayon silang maningkamot sa pagtukod sa usa ka mas maayong kaugmaon, nga puno sa pagtuo, paglaum, ug gugma alang sa Pilipinas nga nahisubay sa mga pagtulon-an sa Simbahan.

Mabuhay ang Pilipinas! Viva Jesus!

(FN Warren Rex Bautista, St. Pio Assembly ACN 4018, San Miguel Parish Panacan)