Malipayong Pag-abot sa Parokya sa Sagrada Pamilya!

Niadtong Hunyo 8, 2025 sa alas 10 sa buntag, nagsugod na og pangabot ang mga parokyano alang sa Welcome Program sa duha ka bag-ong magbalantay, Fr. Dionisio Tabiliran, kura-paroko ug Fr. Danilo Dotollo, isip iyang kaabag.

Sa maong panagtapok gipresenta ang mga miyembro sa matag sona gikan sa nagkalain-laing GKK. Lakip sa mainitong pagdawat sa duha ka bag-ong pari ang mga nindot nga pasugdayag sama sa rondalla, sayaw ug kanta nga gidalit gikan sa lain-laing ministriya.

Si Ms. Vergie Orduña, usa sa mga GSLs niingon mga malipayon kaayo nga gihatagan ang parokya ug mga pari nga maoy muatiman sa mga sakop sa parokya.

Nagpadayag Si Ms Adeth Cal, ang LCCP coordinator, nga isip myembro sa parokya, magpadayon ang tanan sa pagserbisyo alang sa kalambuan sa katawhan sa Diyos bisan pa man sa mga kahuyang ug mga lain-laing hagit sa kinabuhi.

Sa mensahe ni Fr. Danny Dotollo, iyang gipahayag nga siya andam kanunay nga mutabang sa mga buluhaton diha sa parokya. Kanunay siyang abli sa mga tawag kung diin siya gikinahanglan.

Isip tubag, si Fr. Diony Tabiliran, nagpadayag usab nga andam siya mga mualagad sa mga katawhan sa Diyos sa iyang bag-ong parokya. Dugang niya, abli kanunay ang opisina alang sa buot makig-istorya niya. Siya nanghinaot nga siya mupadayon sa pagtubo kung diin siya gibutang sa Dios aron makatabang usab sa pagtubo sa mga parokyano.

Tungkod kay udto naman kadto, nagkahiusa ang mga nanambong sa usa ka simpleng paniudto nga giandam sa mga lideres gikan sa pito ka sona. Nanguli ang tanan nga busog ug malipayon, uban sa mga mithi kauban ang mga bag-ong magbalantay sa Parokya sa Sagrada Pamilya. (Flor Arellano-Deloria)