Nanghinam-Hinam na Akong Mangalagad sa Ginoo

Sulod sa Santos nga Misa, adlaw’ng Domingo Mayo 25, 2025 sa alas sais y media sa buntag nga gidumala ni Rev. Fr. Cirilo Bermudez, Parish Administrator, gipadala ug gipanalanginan ang unom ka mga kabataan isip mga Altar Server sa Parokya ni San Roque dinhi sa Malabog, Davao City.

Nasaksihan sa mga nanimba niadtong adlawa ug nabati ang tumang kalipay human makakita sa panagway sa mga kabataan. Dako usab ang kalipay nga gibati sa ilang mga ginikanan sa pagsul-ob kanila sa ilang uniform isip mga Altar Server.

Matud pa sa usa ka altar server nga mao si Kent Gabriel A.Generosa, onse anyos ang panuigon nga “Dako ang akong kalipay kay maka serve nako sa Simbahan ug excited nako makaalagad sa Ginoo”, usa ka pulong nga makatandog sa pagbati sa makadungog kay bisan ako nga naminaw nanimbawot ang akong kaunoran nga wala ko kasabot sa akong gibati nga kalipay kay murag nabati nko ang Balaang Espiritu nga mikunsad gayod kaniya ug ang mga ka anghelan sa Langit nagmaya kay adunay mga kabataan nga misulod sa Simbahan alang sa pagtinguha nga makapangalagad.

Nalipay usab ang iyang inahan nga si Ladylove A. Generosa nga usa ka GKK Soccom, diin mapasalamaton siya sa Labaw’ng Makagagahum nga ang iyang anak gipili ang pagpangalagad sa Simbahan ug sa atong Ginoo bisan sa iyang kabatan-on, gibati pud niya ang kalipay kay nag bunga ang dugay na niya nga gipangandoy nga ang iyang mga anak magsubay sa dalan alang sa Kabalaan.

Dalaygon ang Dios!

(By Arlene R Tarnate – San Roque Parish – SoCCom Coordinator)