Pagtuo ug Pagpasalamat sa Kalampusan sa Flores de Mayo

Matag bulan sa Mayo, ang mga Katoliko sa Pilipinas naghiusa sa pagselebrar sa Flores de Mayo, usa ka debosyonal nga kalihokan nga ginatugyan alang sa Mahal nga Birhen Maria.

Sa usa ka mainitong adlaw sa kataposang semana sa Mayo, malampusong gipahigayon ang pagtapos sa Flores de Mayo sa Gagmay’ng Kristohanong Katilingban (GKK) ni Sr. San Roque, Kialaw, Sitio Kialaw nga Sakop sa San Roque Parish – Malabog, Paquibato District, Davao City niadtong Mayo 1 tuig 2025. Usa kini ka matahum ug espirituhanong selebrasyon nga gipuno sa pagtuo, pag-ampo, ug pagpasalamat sa Mahal nga Birhen Maria, nga timaan sa kaisog ug pagtuo sa mga sakop sa katilingban.

Pasado ala una sa hapon gihalad ang AVE MARIA atol sa pagrosaryo ug gisundan kini sa Kasaulogan Sa Pulong. Human niini gipahigayon na dayon ang kulminasyon nga diin among na saksihan ang pagpaso sa pipila ka mga kabataan nga nagpresentar sa nakalain-aling reyna alang sa pagpahinungod sa mahal na Birhen Maria, anaa ang Birhen sa Lourdes, Birhen sa Paglaum, Birhen sa Guadalupe, Birhen sa Fatima, Inahan sa Kanunany’ng Panabang, Birhen sa Pagsaka , Immaculada Conception og ang nahimong “REYNA SA FLORES DE MAYO 2025” mao ang Birhen sa Sto. Rosario.

Nahuman kini sa pagpanghatag og ginagmay’ng pahalipay sa mga kabataang nag eskuwela sa Flores de Mayo ug gamay’ng salo-salo alang sa tanan.

Mapasalamaton pag-ayo ang Pangulo Sa Katilingban (PSK) nga si Mary Jane A. Detua sa presensya sa mga kaubanang GSL kun GKK Servant Leader ilabi na gayod sa mag Pangulo Sa Pagpanudlo nga sila Rose R. Saguban, Lucrecia C. Pempeña ug Rena Mae J. Juanites nga diin maoy nigahin og panahon sa pagtudlo sa mga kabataan, kabatan-onan ug hamtong, mapasalamaton usab siya sa mga tanang miyembro ug labaw sa tanan mao ang atong Ginoo nga mao ang tinubdan sa tanan.

Ang pagtapos sa Flores de Mayo sa GKK Sr. San Roque, Kialaw dili lamang kataposan sa usa ka kalihokan, kundi usa ka pagsugod og balik sa bag-ong hugna sa kinabuhi nga mas puno sa pagtuo, gugma, ug paglaum.

Pinaagi sa maong kalihokan, napakita sa mga sakop nga bisan sa kalisod sa kinabuhi, adunay kusog nga makapadayon kung maghiusa uban sa pagtuo ug pagpasalamat sa Ginoo.

Viva Sr. San Roque! Viva Sta. Maria! Sa kanunay, Dalaygon ang Dios! (Jomar Saguban – GKK Sr. San Roque, Kialaw Soccom)