Gasa sa Pagtoo, Bunga sa Pagpaningkamot: 20 ka PTFP-IIREF Students sa San Miguel Parish, Malampusong Nigradwar

Mibati og dakong kalipay ug garbo ang komunidad sa San Miguel Parish Panacan human sa malampusong Graduation ug Sending Forth Ceremony sa 20 ka estudyante sa Parish Theological Formation Program (PTFP) sa Ignatian Institute for Religious Education Foundation, Inc. (IIREF) niadtong Domingo, Hulyo 6, 2025.

Gipangulohan ang Santos nga Misa ni Rev. Fr. Allan Rodriguez, Executive Director sa IIREF, nga puno sa pagpasalamat ug pagdasig alang sa mga nagtapos.

Gisugdan ang ilang pagtuon niadtong Enero 23, 2024, ug human sa 17 ka buwan nga malungtaron nga pagbansay sa Pulong sa Ginoo, gipasidunggan sila karon isip ikalimang batch sa parokya nga nakahuman sa libreng programa.

Natun-an sa mga estudyante ang dagkong pundasyon sa pagtuo sama sa Old ug New Testament, Trinity, Ecclesiology, Christology, Liturgy and Sacraments, Morality, ug Stewardship, uban sa mga magtutudlo nga naggikan mismo sa IIREF. Dili sayon ang panaw, apan ilang giatubang kini uban sa kadasig ug pagtuo.

Human sa Santos nga Misa, usa ka yano apan makahuluganon nga programa ang gisalmotan, diin gipaambit ang ilang mga kasinatian sa pagtuon ug ang dakong pagpasalamat sa ilang pamilya ug mga magtutudlo. Gisundan kini sa usa ka fellowship dinner nga puno sa pagkahiusa isip usa ka pamilya sa pagtoo.

Kini nga selebrasyon dili lang para sa mga nakalampos, apan kini usa usab ka kadaugan sa tibuok parokya. Timaan kini nga ang Ginoo buhi ug naglihok, ug nga ang pag-alagad dili lang kutob sa altar, kondili sa pagpuyo sa kinabuhi nga matinud-anon ug isip usa ka mapasigarbuhong Kristiyano. (Ma. Joneila Laruya)