Malampusong Pagsaulog sa Ika-22 nga Kapistahan ni Sta. Maria Goretti sa RPJ Village ug Seaside Subdivision

Malipayon ug madasigon nga gisaulog sa komunidad sa RPJ Village ug Seaside Subdivision, Matina Aplaya, Davao City ang ika-22 nga kapistahan ni Sta. Maria Goretti niadtong Hulyo 5, 2025. Ang tema mao ang: Madasigong Katilingban Giniyahan sa Espiritu Santo, Naghiusa sa Pagpanaw sa Paglaum sa Kinabuhi nga Kristohanon Uban ni Sta. Maria Goretti. Kini nga kasaulogan usa ka testamento sa lig-on nga pagtuo ug paghiusa sa mga lumulupyo sa maong dapit.

Si Sta. Maria Goretti usa ka batan-ong santos nga naila sa iyang kaisog, kaputli, ug lig-on nga pagtuo kay bisan pa man sa iyang kabatan-on, gipanalipdan niya ang iyang kaputli nga hangtud sa katapusan. Usa ka sakripisyo nga inspirasyon sa tanan, Ilabi na sa mga batan-on sa paglahutay sa pagpanalipod sa ilang dignidad ug respeto sa kaugalingon atubangan sa bisan unsa nga pagsulay – kabilin nga nagtudlo kanato sa bili sa pagpasaylo ug sa walay paglubad sa paghigugma sa Ginoo.

Ang kasaulogan karong tuiga gipuno sa nagkalain-laing mga kalihukan nga nagpalalom sa espirituhanong pagbinayluay ug nagpalig-on sa panaghiusa pinaagi sa pagpanindut sa altar, siyam (9) ka adlaw nga novena ug gitapos kini pinaagi sa usa ka prusisyon – mga mabulukon ug halangdong kalihukan nga bisan simple pero nagpadayag sa pagtuo ug debosyon inubanan sa “Paambit sa Panalangin”.

Panalangin ug paglaum nga magpadayon ang ilang pagtuo ug tradisyon, kalipay ug dakong pasalamat ang gibati sa mga parokyano. Alang sa Pangulo sa Katilingban Igsoon Jonas Piore, “Ang kapistahan dili lamang usa ka selebrasyon kon dili usa usab ka pahinumdom sa pagtambayayong ug sa pasalamat ingon man paambit mga panalangin nga nadawat”.

Matud pa ni PSL Igsoon Norberto “Bebot” P. Llerin, sa iyang usa ka emosyonal ug spirituhanong mensahe, “mahinungdanon ang pagtuo sa pagtubag sa mga hagit sa kinabuhi ug sa pagkabililhon sa pagtinabangay alang sa kauswagan sa tibuok komunidad.

Sa maong selebrasyon sa kapistahan sa RPJ Village ug Seaside Subdivision ang mga lumulupyo ug komunidad naglantaw sa umaabot, inubanan sa espirituhanong paglaum nga mapahigayon ang katuyuan nga makat-on ug makasundog sa dalaygong kinabuhi ni Sta. Maria Goretti. Ang malampusong pagsaulog usa ka timaan nga ang debosyon padayon molambo ug naghatag kahayag sa kinabuhi sa mga lumulupyo sa RPJ Village ug Seaside Subdivision. (Jessica “Jeje” C. LLerin | GKK SoCCom)