Pangayo kay ikaw hatagan

Ika-17 na Domingo sa Ordinaryong Panahon (July 27, 2025)
Gn 18:20-32 / Ps 138:1-2, 2-3, 6-7, 7-8 / Col 2:12-14 / Lk 11:1-13

Dunay usa ka tawo miingon sa iyang higala nga dugay na siya wala mosimba. Unya siya gipangutana kung unsay hinungdan ngano nga wala na siya nagasimba. Siya mitubag nga tungod kay wala man gyud gihatag sa Ginoo ang iyang gipangayo. Ug siya gipangutana pag-usab kung unsa diay ang iyang gipangayo. Siya mitubag nga unta aduna nay snow dinhi sa Pilipinas.

Una sa atong pamalandong, mohatag gayod ang Ginoo kung unsay atong pangayoon. Mao kini ang gisulti sa Ebanghelyo. Ug dili mamakak ang atong Ginoo. Apan, dili Siya mohatag kung unsay makadaot kanato ug unsay dili subay sa iyang plano nga kanunay makaayo kanato. Kay sama sa usa ka maayong amahan nga mohatag sa gikinahanglan sa iyang anak, ang Ginoo nasayod unsay makaayo kanato. Mao gani nga gitudloan kita ni Jesus sa pagtawag sa Ginoo nga atong amahan. Apan nangayo ka unsay makatabang sa imong kaluwasan o sa unsa lamang ang imong tawhanon nga gusto? Pangayo sa Espiritu Santo nga maoy motudlo kanimo unsay imong pangayoon.

Ikaduha, pangayo sa Ginoo sa kalingkawasan sa lubnganan sa sala. Sa ikaduhang pagbasa, atong nadungog nga giluwas kita ni Jesus sa sala, sa paglunang sa atong kahuyang. Gihatagan kita niya sa kagawasan, sa kinabuhi, sa kalipay. Nangayo ka ba sa kagawasan sa pagkulipon sa lumalabay nga kalipay, sa pagkaulipon sa pagdumot, katapol, ug bisyo? Pangayoa sa Ginoo nga dili ka malansang sa pagkontrolar kanimo sa mga kalibotanon nga katagbawan.

Ikatulo, sama nga si Abraham, diha sa unang pagbasa mihangyo pag-ayo sa Ginoo sa pagpasaylo, dili usab unta kita mohunong sa pag-ampo ug paghangyo sa Ginoo alang sa atong kausaban. Dili unta kita maluya ug dili unta kita mawad-an og paglaum nga ang Dios mobag-o gayod kanato kung andam kita nga magpaubos ug modawat sa nga kita nanginahanglan sa tinuoray sa Iyang panabang. Ikaw wala ka ba moundang sa paghangyo ug pag-ampo ngadto sa Dios sa Iyang panabang matag-adlaw? Ayaw paghunong ug ayaw kaluya sa padayon nga paghangyo sa Ginoo.

Ang Dios mohatag gayod kanato sa unsay makaluwas kanato ug dili sa unsay makapahilayo kanato Kaniya. Busa pangayo kay ikaw hatagan. Matod pa sa salmo, sa adalw nga kita mosangpit sa Ginoo sa Iyang panabang, Iya kitang tubagon.