73rd Patronal Fiesta sa GKK San Roque Subasta, Malampusong Gipahigayon

Malipayong nagsaulog ang Gagmay’ng Kristohanong Katilingban (GKK) San Roque, Cogon, Zone 5, Barangay Subasta, Calinan District, Davao City, sa ilang ika-73 nga Patronal Fiesta niadtong Agosto 16, 2025 pinaagi sa usa ka misa pasalamat. Ang selebrasyon adunay tema: “San Roque: Modelo sa Paglakaw uban ang Simbahan nga Nagkatigum, Nagapaminaw, ug Nagalaum.”

Ang misa nagsugod alas 8:30 sa buntag ug gipangulohan ni Rev. Fr. Mario B. Holmina, OSJ, Kura Paroko sa San Francisco de Asis Parish. Sa iyang wali, gipasabot ni Fr. Holmina ang kamahinungdanon sa pagtipig sa pagtuo ug pagkinabuhi uban sa pagkahiusa isip usa ka Kristohanong komunidad, nga nagtuman usab sa tema sa fiesta.

Usa sa mga gipasidunggang personalidad sa maong kalihukan mao si Sr. Melanie Alquizar, MPS, nga kaniadto sakop sa GKK ug karon usa na ka relihiyosong madre sa Maria Perpetuo Soccoro (MPS). Sa pakighinabi, iyang giila ang dako nga papel sa GKK sa pagtukod sa iyang bokasyon.

“Ang GKK mao gyud ang hinungdan nganong naingon ko karon. Dinhi nagsugod ug naugmad ang akong bokasyon,” matod pa ni Sr. Alquizar uban ang dakong pagpasalamat sa iyang komunidad.

Makita usab ang aktibo nga partisipasyon sa tanang sakop sa GKK nga nagtinabangay sa tanang buluhaton gikan sa liturhiya hangtod sa pagpangandam sa fiesta. Nagpabilin nga lig-on ang ilang debosyon ngadto sa ilang patron nga si San Roque, ang bantugang manalipod batok sa mga sakit ug balatian.

Ang maong selebrasyon nagsilbing usa ka dakong timaan sa pagmatinud-anon ug paghiusa sa komunidad sa pag-alagad sa Ginoo samtang nagpadayon sila sa ilang 73 ka tuig nga pagtuo ug debosyon. (Jeffren Miguel)