Bibliyampo Congress 2025: Pagpanaw Uban sa Pulong sa Dios sa mga Malaumong Magpapanaw

Napuno sa kasadya ug diwa niadtong Agosto 2, 2025, ang Jesus and Mary Thevenet School Foundation, Inc. samtang nagtapok ang mga magpapanaw alang sa gilauman nga Bibliyampo Congress 2025. Uban ang tema nga “Pulong sa Dios Kauban sa mga Malaumong Magpapanaw”, nahimong tinood nga timaan ang maong kalihokan sa gahum sa Pulong sa Dios nga nagdasig, naghiusa, ug nagbag-o sa kasingkasing sa katawhan.

Sa pag-abli niini sa 7:00 sa buntag, nagsugod og abot-abot ang mga partisipante. Gisugdan kini sa Pagpahaluna diin kini usa ka mahilum nga pagpangandam sa kasingkasing sa presensya sa Ginoo—gisundan sa masinati nga Bible Dance Experience ug ang solemne nga Bible Enthronement, usa ka pahinumdum nga ang Pulong sa Dios mao gyud ang sentro sa panaw sa Kristohanong kinabuhi.

Ang kongreso nagtinguha nga dili lang sabton ang Pulong, kondili buhion kini sa matag adlaw. Gidasig ang mga partisipante nga masinati kini ingon tinubdan sa paglaum nga dili mapakyas, palig-onon ang relasyon sa Dios pinaagi sa pag-ampo ug liturhiya, ug mahimong matinud-anong saksi sa Ebanghelyo pinaagi sa pulong ug buhat. Sulod usab Sa Bibliyampo Congress ang Plenary Talk gihatag ni by Rev. Fr. Ben Jerson Cañete, SThD diin nagsentro sa tema nga “Ang Kauban sa Malaumong Pagpanaw mao ang Pulong sa Dios.”

Usa sa labing gipaabot nga bahin mao ang pagsaulog sa Santos nga Misa sa alas 11:00 sa buntag, diin ang mga pag-ampo mitubo sama sa insenso ug ang mga kasingkasing nabag-o diha sa presensya ni Kristo sa Eukaristiya. Sa hapon, napuno sa kusog ug katawa ang mga kalihokan gikan sa makalingaw nga animasyon ug cheers and yells. Misunod dayon ang sharing matag parokya ug Praise and Worship.

Sa pagtapos sa adlaw, ang Bibliyampo Congress nagpabilin nga usa ka dili malimtan nga kasinatian alang sa tanan nga miapil. Dili lang kini usa ka pagtigum kundili usa ka panaw sa pagtuo. Ang Pulong sa Dios dili lang gibasa ug giwali, kondili gisayaw, giampo, ug gipuy-an. Ug sa ilang pagpauli, gidala sa matag usa ang malinaw nga panawagan sa kongreso: nga magpadayon sa pagpanaw uban ang paglaum, uban ang Pulong sa Dios isip giya, ug si Kristo isip kanunay nga kauban sa pagtuo.