Diyutay ra ba ang maluwas?

Ika-21 na Domingo sa Ordinaryong Panahon (August 24, 2025)
Is 66:18-21 / Ps 117:1, 2 / Heb 12:5-7, 11-13 / Lk 13:22-30

Dili ba buot sa Dios nga ang tanan maluwas? Dili ba gipadala sa Amahan ang iyang anak aron sa pagluwas ug dili pagsilot?

Sa Ebanghelyo, gitubag ni Jesus ang nangutana kaniya kung diyutay ra ba ang maluwas pinaagi sa pag-ingon nga “paningkamot pagsubay sa sigpit nga dalan.” Ang sigpit nga dalan nagpasabot sa dili sayon nga pagpili sa pagpasensya kaysa pagdali-dali, sa pagpasaylo kaysa pagpanimalos, sa pagpanghatag kaysa pagdawat, sa pagpalabi sa uban kaysa pagpalabaw sa kaugalingon. Ikaw makapili ka ba niining kinaiyaha bisan malisod?

Mao gani nga sa ikaduhang pagbasa kita gipahimangnoan sa paglahutay sa disiplina. Ang disiplina nagpasabot sa pagsubay sa lakang ni Jesus. Sama sa pagsunod aron mosayaw sa sonata o tugtog, ang disiplano nga tawo mosayaw, mosunod, molihok sumala sa sonata o tugtog ni Jesus, atong magtutodlo. Ang disiplinado nga tawo modesisyon ug mopili sa mga mithi ug gipanudlo sa Ebanghelyo. Bisan lisod, ang tawong disiplinado dili mapalit sa kwarta, ni mahulga sa gahom.

Sama sa mga Israelita diha sa unang pagbasa, kining maong kaluwasan gitanyag bisan sa ginagmay nga buhat nalang sa tanan. Buot sa Ginoo nga ang tanan iyang makauban sa iyang gingharian. Kini mahimo pinaagi sa paghinlo sa tagsa-tagsa ka huna-huna aron kini mosubay sa pagbuot sa Dios.

Busa ang kaluwasan nga alang sa tanan, tungod kay ang Dios walay pinalabi, buhat sa Dios una sa tanan. Apan ang disiplina sa matag usa gikinahanglan isip tubag sa iyang tanyag. Busa, panglakaw Kamo sa tibuok kalibotan ug isangyaw ang Maayong Balita!