Ika-23 ka Tuig nga Kapistahan ni Sr. San Roque Gisaulog

Malipayong gisaulog sa mga GKK Servant Leaders (GSLs) ug miyembro sa Gagmay’ng Kristohanong Katilingban (GKK) Sr. San Roque sa Emilia Homes, Cabantian, Davao City diin nahisakop kini sa Parokya sa St. Mary of the Perpetual Rosary Parish ang ika-23 ka tuig nga kapistahan sa Mahal nga Patron Sr. San Roque diin adunay tema nga nagkanayon: Sr. San Roque “Modelo sa Diosnong pagpangalagad diha sa pagka mapaubsanon, malipayon ug madasigon nga piniyalan.”

Nagsugod ang Novena /Kasaulogan sa Pulong sa Agosto 7 hangtod Agosto 15, 2025 sa 6:30 ang takna sa gabii. Ang Santos nga misa gisaulog niadtong Agosto 16, 2025, Sabado sa alas 10:00 sa buntag nga gipangulohan ni Rev. Fr. Orlando Angelia, Kura Paroko sa maong Parokya.

Sa homiliya sa Kura Paroko gihatagan og gibug-aton ang hiyas ni San Roque nga mapa-ubsanon sa pagtambal sa mga masakiton bisan pa nga ang sakit makatakud. Kung ibutang ang iyang kamot sa dughan mamaayo kini hangtud nasakit siya kay natakdan. Niadto siya sa kalasangan, namalandong, nag-ampo ug nisalig sa God providence pinaagi sa iro nga nagahatag og pan ug ang iyang samad gitelapan. Isip piniyalan sa dihang naayo na siya niadto sa Roma ug didto adunay giyera ug naalaan nga spy maoy gidakop ug nabilanggo ug namatay.

Unsa nga klase na piniyalan si San Roque? Panag-ingnan sa usa ka piniyalan nga malaumong naga panaw paingon sa himayang walay katapusan, matinud-anon ug masaligon sa Dios. Taliwala sa mga hagit nga nasinati sa katilingban. Mao kini ang hagit sa mga magtutuo: Andam ba kita motahan sa atong kaugalingon sa pag-alagad alang sa kalamboan ug kahiusahan sa katilingban.

Pagkahuman sa Santos nga Misa adunay panag-ambitay ug programa nga gipahigayon sama sa Parlor Games, Basketball, diin nalipay ang tanan sa panaghiusa diin nagkahimamatay sa mga miyembro sa katilingban.

Sa katapusan, mapasalamaton si Fr. Orly sa kalampusan sa selebrasyon ug nanghinaut nga sama sa hiyas sa Mahal nga Patron Sr. San Roque magpabiling mahigugmaon sa isigkatawo.

VIVA SR. SAN ROQUE!

(By Aurelia A. Ayco, GKK SoCCom)